RBC i Cpost International a sera akuerdo pa fasilitá entrega di tarheta di krédito na klientenan di RBC
RBC i Cpost International a sera akuerdo pa fasilitá entrega di tarheta di krédito na klientenan di RBC
Willemstad, 23 òktober 2020 – Ku gran satisfakshon i orguyo RBC i Cpost International ta anunsiá ku e kompanianan a sera un akuerdo pa fasilitá klientenan di RBC. E akuerdo ta enserá ku Cpost International lo entregá tarheta di krédito na klientenan di RBC.
Apesar di e desafíonan di último tempu ku nos komunidat ta enfrentá, tin diferente desaroyo positivo ta tuma lugá. E akuerdo entre Cpost i RBC sigur ta unu di nan. Cpost di su banda ta sumamente honrá ku e konfiansa ku RBC a depositá den dje komo kompania di pòst nashonal di Kòrsou. Pa Cpost ta un honor di por sirbi klientenan di RBC i entregá nan nan tarheta di krédito te den nan man.
Segun sr. Thomas Roggendorf, direktor di Cpost International: ‘Pa Cpost por keda un kompania di vital importansia, nos mester por hasi muchu mas ku solamente entregá karta. Nos mester por duna mas servisio ku ta duna balor agregá na nos klientenan. Nos mester por brinda mas servisio di akuerdo ku e nesesidatnan di nos klientenan. Esaki sigur lo yuda nos pa generá mas entrada i sigui krese komo kompania. Mi ta sumamente satisfecho ku e dil ku nos a logra di sera ku RBC, pasobra esaki ta kuadra perfektamente den e strategia di nos kompania.’
Pa lokual ta trata RBC, komo un banko ku ta enfoká riba e nesesidatnan di su klientenan, ta importante pa e por fasilitá bida di su klientenan. Perkurá pa su klientenan risibí nan tarheta di krédito te kaminda ku nan ta, sigur ta un di e esfuersonan ku ta kontribuí na e ophetivo prinsipal di RBC aki.
‘Pa nos banko ta sumamente importante pa nos brinda nos klientenan un servisio personifiká, satisfaktorio i konfiabel. Pa e motibu ei semper nos ta trata di trese inovashon den nos servisionan pa por asistí nos klientenan mas mihó. Den kaso di e akuerdo ku nos a sera ku Cpost, nos tin e pleno konfiansa ku esaki ta pèrmití nos pa sirbi nos klientenan ainda mas mihó, manera nan meresé i ta deseá. Ademas nos ta kere firmemente ku aliansanan manera esaki ta yuda nos tur komo kompania pa sigui krese i ta mas sólido’, segun Pierrot Hurtado, Managing Director RBC Royal Bank N.V.
Tantu RBC i Cpost ta kontentu ku e akuerdo ku e kompanianan a sera resientemente. E kompanianan lo hasi nan máksimo esfuerso pa sigui fomentá kolaborashon na benefisio di ambos kompania, nan klientenan i nos komunidat di Kòrsou den su totalidat.
Riba foto drpd: Sr. Pierrot Hurtado, Managing Director RBC Royal Bank N.V., sr Jervhes Josephia Direktor Business Development i sr. Thomas Roggendorf, direktor di Cpost International N.V.