PIN ku programa di akshon pa hiba agrikultura i naturalesa na e siguiente nivel 

 PIN ku programa di akshon pa hiba agrikultura i naturalesa na e siguiente nivel 

 

No tin duda ku Partido Inovashon Nashonal (PIN) i su lider Sra. Suzy Camelia-Römer durante su periodo komo minister a sa di hiba agrikultura na un nivel ku ya pa varios dékada Kòrsou no a konosé. PIN a sa di pone e base pa e kambio fundamental den seguridat alimentisio na Kòrsou den e Akuerdo di Gobernashon 2017-2021 i den un plan di maneho ku ya ta ser ehekutá for di 2017. Fundeshi pa e kambio ta e programa preventivo Kunukito di Kas i di Bario, ku for di 2018 a ser lansá ku e meta pa siña nos hendenan produsí kuminda salú nan mes i hasi esaki parti di nan kuminda diario. Mas despues e programa a ser ampliá na diferente skol i kasnan di grandi.

 

Mirando e balor pa desaroyo di nos komunidat, sra. Camelia-Römer a lansa tambe for di 2018 diferente kurso profeshonal pa asina sigurá ku tin sufisiente kapasidat pa empleo i empresario agroprekuario. Mas ku 200 hende, prinsipalmente hoben a partisipá na kursonan di agrikultura Sintrópiko, Hydroponics i Agrikultura Orgániko Regenrativo i peska. Pa sostené agrikultura, krio di bestia i peska, sra. Camelia-Römer a sa di redefiní e kuadro pa fiansa for di Fondo Agrario pa hasi esaki mas aksesibel pa esnan ku kier amplia òf kuminsa produsí pa merkado. Ya alrededor di 2 mion a ser duná na fiansa ku un interes abou di 2% i kondishonnan di pago flèksibel. 

 

Tambe e minister a yega na akuerdonan ku otro ministerionan pa otorgamentu di tereno pa agrikultura. Ta konosí ku Kòrsou tin alrededor di 2,000 hektaria di tereno destiná pa agrikultura, pero ku un retraso di basta aña den tratamentu di petishonnan pa tereno pa por planta of krio di bestia. Sra. Camlia-Römer ta spera ku esaki no ta warda riba riba su re-ingreso den e gobièrnu nobo na 2021. Un otro akuerdo ku sra. Camelia-Römer ta na su kuna, ta un tarifa redusí di awa pa agrikultura. Sinembargo, esaki ta wardando pa e minister di Desaroyo Ekonómiko dekretá pa asina esnan ku ta planta pa merkado por tin awa pagabel pa por ofresé fruta i berdura pagabel na pueblo. Otro proposishon ku e PIN a laga tras serka Minister di Desaroyo Ekonómiko, ta unu pa amplia e kantididat di sorto di fruta i berdura ku ta ser protehá pa medio di prohibishon di importashon. Sra. Camelia-Römer ta spera ku e fasilidatnan aki tambe pronto ta bira realidat. 

 

PIN ta lansando un trayekto pa komuniká na pueblo e aserkamentu di agrikultura for di un brel regenerativo. Esei lo nifiká den praktika ku gastunan pa produkshon di fruta i berdura lo baha konsiderablemente. Na su turno pueblo lo por disfruta di un variedat mas amplio di fruta i berdura fresku na un preis muchu mas barata. E parti aki di e programa di akshon ku pronto PIN lo divulgá ta konta tambe ku intensivashon di reforestashon, esta drecha nos tera dor di planta palu i matanan adekuá den areanan ku a ser gravemente afektá. Agrikultura regenerativo no solamente ta yuda ku produkshon di kuminda salú i pagabel, pero ta kontribuí tambe na baha emishon di karbon i direktamente drecha nos ambiwnte pa biba den. 

 

Por spera un lista di PIN dotá ku eksperiensha, konosementu i pashon pa pone Kòrsou riba mapa mundial di produkshon di fruta i berdura tropikal i un ehèmpel den region pa drei bèk e kambio di klima.     

This site uses Akismet to reduce spam. Learn how your comment data is processed.

error: Content is protected !!
%d bloggers like this: