RDK TA KONFIRMÁ KU SU SUPERVISHON I GERENSHA TA DI AKUERDO KU NORMA DI BON GOBERNASHON I SU STATUTONAN 

RDK TA KONFIRMÁ KU SU SUPERVISHON I GERENSHA TA DI AKUERDO KU NORMA DI BON GOBERNASHON I SU STATUTONAN 

Willemstad 26 di Òktober 2020 – Gerensha di Refineria di Kòrsou (RdK) ta haña na su lugá pa splika i aklará algun informashon inkorekto ku ta keda ventilá den komunidat.  Tantu supervishon komo maneho di e kompania ta keda hibá estriktamente konforme loke tin stipulá den statutonan di e kompania. Kumplimentu ku reglanan di bon gobernashon, inkluso transparensha, ta loke ta rigi e supervishon i maneho di RdK. 

Bahamentu i nombramentu di miembronan den e Hunta di Komisario di RdK ta bai konforme statuto i e roster di apuntamentu i bahamentu, manera aprobá dor di e propio miembronan di Hunta di Komisario di e kompania.  Prospekto miembronan pa keda apuntá den e Hunta di Komisario mester kumpli ku e profil stipulá.  E prospektonan pa bira miembro nobo ta keda skrutiná pa Stichting Bureau Toezicht en Normering Overheidsentiteiten (SBTNO.)  Tur konseho duná dor di SBTNO ta transparente i disponibel pa públiko.  Konforme e roster di apuntamentu i bahamentu akordá dor di e miembronan di Hunta di Komisario di RdK, den luna di Ougùstùs último a toka turno pa un di e komisarionan baha i mientrastantu un miembro nobo, ku un profil spesífiko, a keda apuntá den e Hunta di Komisiario, konforme e resultado di e skrutinahe di SBTNO.

Nombramentu di un direktor nobo dor di Akshonista tambe ta algu ku ta tuma lugá den tur transparensha.  Na Novèmber 2018 Hunta di Komisario di RdK a apuntá e aktual direktor interino.  Hunta di Komisario, na Yüni último, a tuma e desishon pa kuminsá ku e trayekto pa buska un Direktor Statutario pa RdK.  Un i tur por a mira e avisonan ku resientemente a keda publiká den korantnan lokal.  Ta trata di un solisitut habrí kaminda tur kandidato ku ta kere ku nan tin e kualifikashonnan nesesario por solisitá i pasa dor di e proseso di skrutinahe, e último aki ya a keda definí. Na final di e trayektoria, e Direktor Statutario nobo pa RdK lo keda nombrá dor di Akshonista di e kompania.