Deklarashon di Promé Minister riba e último desaroyonan entre Kòrsou i Ulanda

Deklarashon di Promé Minister riba e último desaroyonan entre Kòrsou i Ulanda

Geplaatst op 26 October 2020 dor di Ministerio Asuntunan General i Promé Minister

Deklarashon Minister Presidènt Rhuggenaath – 26 di òktober 2020

Pueblo di Kòrsou,

Den mi último mensahe na boso, mi a anunsiá avansenan signifikante riba e kombersashonnan ku a hiba último tempu ku Hulanda, pa yega na un akuerdo pa finansiamentu i kolaborashon duradero. Despues di esei, nos no a para ketu i a sigui deliberá dirigí riba vários detaye di e kolaborashon tan importante aki pa progreso i bienestar di Kòrsou.

Sentral den nos kombersashonnan resien den Konseho di Minister, tabata e diferente pasonan ku Gobièrnu di Kòrsou mester tuma den kuadro di e eksigensianan mará na e di dos i di tres transh, pa por risibí sosten finansiero di Hulanda.

Awe – despues di profundo análisis entre ami i koleganan Minister – mi por informá boso ku durante reunionnan di Konseho di Minister riba 20 i 21 di òktober, nos komo Gobièrnu a tuma algun desishon hopi importante pa ku redukshon di nos gastunan den e aparato gubernamental, maneho di nos finansa públiko i dunamentu di sosten finansiero pa medio di e pakete di sosten.

Spesífikamente, e siguiente puntonan a keda tratá:

Huntu ku nos ekspertonan a prepará i aprobá leinan den forma di konsepto ku lo ser entregá na Raad van Advies pa formalisá  redukshon di 25% di e pakete total di kondishonnan laboral di Parlamentario i Ministernan.

Den e leinan, e base ku a usa pa salario di mandatarionan for di 2010 lo keda formalisá na skal 17 i e korekshon pa skal 18 basá riba e salario di funshonarionan mas haltu di Gobièrnu, lo drenta na vigor numa na yüli 2021, pues pa e siguiente gobièrnu. E konsepto di lei tambe ta enserá e posibilidat pa un evaluashon di e situashon finansiero-ekonómiko di e momentu ei, pa Gobièrnu por disidí di ekstendé e korte di salario ku ta inkluí e skal mas abou, esta skal 17, i korte di 25%.

Nos a aprobá tambe e proposishon di lei pa bai Parlamento despues di a risibí konseho di Raad van Advies riba redukshon di e pakete total di kondishonnan laboral di empleadonan públiko i semi gubernamental ku 12.5%.

Resientemente SER a risibí konsepto di un lei pa yega na optimalisashon di kompanianan di Gobièrnu, kual tambe ta trata redukshon di 12.5% di e kondishonnan laboral pa tantu Gerensha komo personal di e kompanianan aki, i ademas ta inkluí normanan i plafòn pa salario di funshonarionan haltu di e entidatnan aki. E proyekto di lei lo ser entregá alabes na Raad van Advies pa e konseho nesesario.

Seguidamente, Gobièrnu, despues di a finalisá e ‘business case’ di CMC ku un segundo opinion, a entregá e totalidat aki na Cft. E último parti di e ‘business case’ ta regardá gastu di kuido di hòspital.

Por último, pero sumamente importante, Gobièrnu a prepará un adaptashon di su presupuesto pa por sigui garantisá pago na e gruponan mas vulnerabel den nos komunidat pa medio di e pakete di sosten. E presupuesto adaptá tambe a keda entregá na Cft.

Pueblo di Kòrsou, esakinan ta pasonan difísil pero nesesario pa garantisá i salbaguardiá desaroyo duradero di nos pais. Den union i trahando huntu, nos komo pais lo bai dilanti i benefisiá di e desishonnan ku nos ta tumando awe.

Gobièrnu ta keda karga su responsabilidat ni maske kon grandi e retonan ta ku nos ta enfrentá. Nos lo sigui traha dia i nochi, inkansabelmente, pa logra e metanan ku tin nos dilanti pa Kòrsou.

Ami personalmente ta i lo keda hasi tur loke ta nesesario i na mi alkanse, pa yega e “liña final” ku éksito.  Na hulandes tin un dicho ku ta bisa “de laatste loodjes wegen het zwaarst”, esta e lastu kilometer ta esun di mas pisá. No falta muchu pa nos yega na palabrashonnan definitivo ku Gobièrnu di Hulanda i e kaminda tabata pisá. Pero si nos ke realmente logra esaki, eksitosamente, nos mester pone nos diferensianan un banda i lucha huntu na bienestar di nos pais, nos pueblo i futuro di nos yunan.

P’esei, dia 30 di òktober benidero, mi mes lo ta presente durante e reunion di Konseho di Minister di Reino na Hulanda, pa representá Kòrsou. Pasó mi ta kere den nos pais, i loke nos por logra trahando huntu pa hiba nos pais dilanti.

Mi meta ta pa Kòrsou bira aun mas fuerte, pa por sobrebibí kualke reto ku presentá nos dilanti den futuro. Mi tin fe den Dios i den bosnan. Pueblo di Kòrsou, ku enfoke nos por logra esaki!

Ban finalisá e trayekto aki, ban pa un etapa nobo.