Su mes palabranan ta kome awe; PORFIN PROMÉ MINISTER RHUGGENAATH A KUMINSÁ MIRA E REALIDAT DI GEO POLITIKA
Su mes palabranan ta kome awe;
PORFIN PROMÉ MINISTER RHUGGENAATH
A KUMINSÁ MIRA E REALIDAT DI GEO POLITIKA
…Mester kuminsá proseso pa liberá Piskadónan YDK sera na Venezuela …
WILLEMSTAD – Ku atenshon Movementu Futuro Kòrsou, a tuma nota di e desaroyonan siman pasa, kaminda Presidente di Venezuela Nicolas Maduro Moros a bisa di ta interesá pa reaktiva relashon ku Islanan Aruba, Boneiru i Kòrsou, sigur pa loke ta trata aspektonan ekonómiko i kultural.
Grandi tabata nos sorpresa, na momentu ku por a tuma nota di e reakshon di nos Promé Minister, Eugene Rhuggenaath ku a bisa i nos ta sita; Venezuela ta manera un famia i ruman.
Movementu Futuro Kòrsou ta bisa ku por fin Promé Minister Eugene Rhuggenaath a kuminsá pensa manera mester a pensa, pasombra tur su akshonnan i tambe deklarashonnan for di dia ku e la huramentá komo mandatario na mei 2017 tabata kontra di Venezuela i su presidente.
Mester realisá ku ta Estádos Unídos tin Venezuela manera e ta awor aki. Tur e bòikòtnan no a hasi e Gobièrnu di Maduro nada, pero si a afektá e pueblo ku dia pa dia a bin ta sufri mas i mas pa falta di rekurso. E kos aki ta inkreibel, biniendo for di un pais ku ta riku na mineral i tur sorto di materia prima, inkluso un dje posnan di petroli di mas grandi na mundu.
Awe Gobièrnu Hulandes ta realisando ku no ta bale la pena sigui lucha kontra di Venezuela, mirando ku e plannan ku Merka i su aliadonan inkluso Hulanda a traha pa un intervenshon militar ku no ta tuma lugá mas
Movementu Futuro Kòrsou ta haña ku e promé deklarashon ku Promé Minister di Kòrsou, Eugene Rhuggenaath mester a hasi tabata di sali públikamente i bisa ku e no ta rekonosé Juan Guido mas komo presidente di Venezuela i ta duna rèspèt na Nicolas Maduro komo e presidente legítimo di Venezuela ku siman pasa Gobièrnu
Hulandes a manda kredensialnan di un embahador nobo p’e.
Movementu Futuro Kòrsou ta kontentu ku porfin Promé Minister Eugene Rhuggenaath a kuminsá wak e kosnan manera nan ta i ta bon pa e no lubidá kiko el a yega di papia den pasado.
Banda di tur e kosnan aki, Movementu Futuro Kòrsou ta di opinion ku un dje promé akshonnan ku mester tuma lugá ta ku Promé Minister mester kuminsá e proseso pa saka e piskadónan di Kòrsou ku ta sera inhustamente na Venezuela. A hasi komo sifuera ku e piskadónan aki a kometé algu ilegal i a akusánan di trafikashon di gasoil, pero tin filmashon ku nan a yena gasoil aki na Kòrsou
Esaki ta un oportunidat úniko pa Promé Minister di Kòrsou, Eugene Rhuggenaath demostrá ku e ta un lider di un pais. E mester asumí su responsabilidat i buska manera pa trese e piskadónan yunan di Kòrsou ku ta detené na Venezuela bek serka nan famianan.
Por fin Promé Minister di Kòrsou, Eugene Rhuggenaath a kuminsá mira e realidat di Geo Polítika.
Gilmar “Pik” Pisas
Movementu Futuro Kòrsou
