CBCS ta promové maneho di sèn efektivo durante Luna di Edukashon Finansiero

CBCS ta promové maneho di sèn efektivo durante Luna di Edukashon Finansiero
Willemstad/Philipsburg: E aña aki Centrale Bank van Curaçao en Sint Maarten (CBCS) ta organisá e “Luna
di Edukashon Finansiero” pa di dos aña konsekutivo den luna di novèmber. Durante di e Luna di
Edukashon Finansiero ta pone atenshon na e asuntunan finansiero ku ta dediká pa hasi nos komunidat
finansieramente mas resistente. Tambe lo dediká atenshon na e funshon i importansia di CBCS pa e
sistema finansiero i pa nos komunidat. CBCS ta entusiasmá pa tur aktividatnan ku lo tuma lugá durante
den kuadro di e Luna di Edukashon Finansiero.
Den e promé siman di novèmber, CBCS ta enkurashá komunidat di Kòrsou i Sint Maarten pa hasi
uso di un presupuesto (pa famia). Pa fasilitá esaki CBCS ta brinda un ehèmpel di un presupuesto ku
por wòrdu adaptá, den 3 idioma riba su wèpsait. Pa asistí CBCS tambe a produsí videonan di
animashon pa splika paso pa paso kon pa yena e presupuesto.
Den e di dos siman di Luna di Edukashon Finansiero CBCS ta organisá dos seminario riba e tema
di “resistensia finansiero”. E promé seminario (12 di novèmber) ta organisá den kolaborashon ku
University of Curaçao (UoC) i lo brinda presentashonnan di ámbos instituto. E seminario aki ta dirigí
riba studiantenan i esnan interesá den estudionan finansiero. E di dos seminario (13 di novèmber) ta
organisá den kolaborashon ku International Organization of Securities Commissions (IOSCO) i ta
konsistí di presentashonnan di CBCS i otro reguladónan di e region Karibense. E seminario aki ta
destiná pa reguladónan i ekspertonan finansiero. Ámbos seminario lo sera ku un pènel di diskushon
ku ta duna oportunidat na partisipantenan pa hasi pregunta. Pa medio di e página di Facebook di
CBCS lo duna mas informashon relashoná ku e seminarionan aki.
Den e di tres siman, CBCS ta sostené diferente aktividat di Global Entrepreneurship Week (GEW)
ya ku edukashon den área empresarial tambe ta forma parti di edukashon finansiero. GEW ta organisá
un bootcamp i un kompetensia di presentashon pa empresarionan di Kòrsou i Sint Maarten. Alabes lo
tene un kompetensia di debate entre studiantenan di skol sekundario i studiantenan universitario. E
temanan di e debate tin di aber ku ’metanan pa un desaroyo sostenibel’ (konosí komo Sustainable
Development Goals òf SDG).
Den e di kuater siman, CBCS ta ofresé charlanan interaktivo virtual na studiantenan di skol
sekundario. E charlanan tin di aber ku e tema di ‘Gasta i presupuestá efektivo’ i ‘Spar i invertí
efektivo’.
Ku a inisiativanan aki, CBCS ta deseá duna un aporte positivo na e krea resistensia finansiero i ku esei
un komportashon finansiero responsabel den e komunidatnan di Kòrsou i Sint Maarten.
Pa mas informashon tokante di e Luna di Edukashon Finansiero òf e otro seshonnan ku CBCS ta
brinda den kuadro di edukashon finansiero, por tuma kontakto ku CBCS pa medio di e-mail na
info@centralbank.cw.
CBCS ta enkurashá pa bishitá su wèpsait http://www.centralbank.cw i su página ofisial di Facebook pa keda
na altura di tur aktividat ku e ta organisá.
Willemstad, 2 di novèmber 2020
CENTRALE BANK VAN CURAÇAO EN SINT MAARTEN

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: