Ministerio di VVRP a para trabounan di konstrukshon di rampa na Playa Kenepa

Ministerio di VVRP a para trabounan di konstrukshon di rampa na Playa Kenepa

Geplaatst op 09 November 2020 dor di Ministerio Desaroyo Ekonómiko

WILLEMSTAD – Riba djaweps 5 di novèmber, Minister Jesus-Leito di Ministerio di VVRP a para e trabounan ku ta tumando lugá pa krea un ‘rampa’ na Playa Kenepa. Esaki pa motibu ku e proseso interno no a kana segun regla.

E meta prinsipal ku kual a kuminsá konstruí e rampa aki, tabata pa hasi e playa aksesibel pa personanan ku no por baha trapi òf ku ta den stul di rueda (rolstoel), pues personanan ku pa un òf otro motibu físiko no por yega na e playa. E meta aki riba su mes ta unu hopi noble i ta di elogiá e instansianan gubernamental ku a kuminsá ku esaki.

Lamentablemente, no tabatin palabrashon interno riba e diseño ni su efekto riba e playa. E funshonarionan di Servisio pa Obra Públiko (OW) ku a traha huntu ku CTB, no a informá nan superiornan adelantá di e proyekto ni tampoko a haña aprobashon pa esaki. Tampoko a envolví demas organisashon òf ministerionan ku tambe lo mester a duna konseho previo.

Pa motibu di esaki Minister Jesus-Leito a disidí pa para e konstrukshon, hasi un evaluashon i tuma konseho, pa despues disidí kiko ta bai hasi. Esaki ku e meta pa drecha e aksesibilidat pa personanan ménos movibel. Durante un konferensha pa prensa dia 9 di novèmber, Ministernan Jesus-Leito i Martina a duna tur detaye den liña di tempu relashoná ku e proyekto aki na Playa Kenepa.

Na momentu ku yega na resultado di e evaluashon, lo informá komunidat debidamente. Pa awor akí, nos por ta trankil sabiendo ku e trabounan lo no kontinuá sin evaluashon ekstenso. Durante e evaluashon, lo perkurá mas tantu posibel tambe pa no tin desperdisio di material ku a usa kaba. Pues lo yega na un desishon teniendo kuenta ku tur faktor.

Pa deskargá e presentashon ku a keda kompartí durante e rueda di prensa riba e tópiko aki por klek e siguiente link: https://bit.ly/3kfgpxB

 

 

 

 

 

 

Ministerio konserní 

This site uses Akismet to reduce spam. Learn how your comment data is processed.

error: Content is protected !!
%d bloggers like this: