Minister Xiomara Maduro ta informa: E ‘leenovereenkomst’ pa 209 miyon florin a keda firma pa Gobierno por cumpli cu su obligacion financiero te cu december 2020

Minister Xiomara Maduro ta informa:

E ‘leenovereenkomst’ pa 209 miyon florin a keda firma pa Gobierno por cumpli cu su obligacion financiero te cu december 2020

ORANJESTAD – Na mesun momento cu Minister President Evelyn Wever-Croes a firma e acuerdo politico na Hulanda, na Aruba Minister di Finansa a firma e ‘leenovereenkomst’ pa e fiansa di ‘derde tranche’ di 209 miyon florin pa Aruba. Cu e fiansa aki Gobierno por cumpli cu e obligacion financiero te cu december 2020. Di e manera aki por tin e trankilidad cu Gobierno tin suficiente fondo pa por paga, entre otro, FASE, bijstand, comercio y ademas por sigui yuda comercio cu Subsidio di Salario. Desde inicio di e crisis Aruba a bin ta hayando sosten di likides den forma di fiansa for di Hulanda. E promer dos ‘tranche’ a bay sin mucho condicion, pero pa haya e di tercer ‘tranche’ si Hulanda a pone condicionnan mas pisa cu a hiba na un negosacion di varios luna. Den e periodo aki Gobierno a percura pa hiba un maneho financiero hopi prudente den cual a percura pa tur locual ta yudansa na Pueblo y comercio keda intacto. Na dado momento tambe mester a recuri na e mercado local pa por a haya e fondonan necesario pa por a cumpli cu e obligacionnan financiero. Aunke e no tabata algo den e planes financiero di Gobierno pa aña 2020, Minister di Finansa a haci uso di e espacio cu ley ta brind’e pa asina por a sigura cu nos Pais no keda mas perhudica na man di e crisis aki. Minister Xiomara Maduro ta spera cu awor cu a yega na acuerdo cu Hulanda, e trankilidad por bin bek den comunidad. E invitacion ta pa nos tur traha hunto pa asina por saca nos Pais dilanti, ya cu Aruba ta di nos tur.