Calmes ta yama pueblo danki pe sosten kontra e Lei anti-pueblo.

 

Calmes ta yama pueblo danki pe sosten kontra e Lei anti-pueblo.

Trabou Pa Kòrsou (TPK) ta sumamente kontentu ku pueblo a laga su bos di malkontentu resoná poniendo partidonan PAR/MAN den Parlamento posponé tratamentu dje lei di eksepshon den reunion públiko.

For di e promé tratamentu dje Lei aki den komishon sentral Rennox Calmes a rechasá su kontenido. E kontenido ta wòrdu kategorisá komo anti-pueblo. “E lei aki no ta na pueblo su benefisio” sigun Calmes.  Den ámbos reunionnan tékniko, kaminda e Lei aki tabata tópiko, Calmes a mustra su preokupashon pe kontenido i kuestioná kuantu poder un solo persona ta bai haña pa mínimal 3 luna kibrando forsa di Parlamento. Pa no papia mes ku e Lei ta duna un ámtenar (no un polis) tur poder pa drenta bo kas sin identifiká i sin aprobashon di korte. E motibunan ku Gobièrnu ta laga su lakayonan keda ripití pa kambia opinion públiko riba e Lei aki pa TPK ta inválido.

Algun ta mustra ku Hulanda i St. Maarten tambe tin un Lei asina. Desafortunadamente nan no ta bisa e bèrdat ku Hulanda no ta uzando e “Uitzonderingstoestand”, pero un otro Lei temporal i dediká pa solamente epidemia (COVID-19). Dikon Gobièrnu ke bini ku un lei di guera kontra COVID-19? Esaki pueblo ke?  Pueblo no ta kèns i ya tin tehi dje manipulashon i mentiranan ku Gobièrnu ta saka via su plataformanan. TPK ta kere ku p’esei mes Gobièrnu a hasi restrikshon di prensa parti dje Lei.

Tur hende por kòrda kon Calmes a alerta i bosifera su disgustu pe Lei aki. Awe TPK ta kontentu ku pueblo su bos a triunfá. Un solushon presentá pa TPK ta pa traha un Lei dediká pa Epidemia mané na Hulanda. Lamentablemente e gobièrnu ta terko. TPK lo keda vigilá e proseso dje lei aki ku wowo di falki. 

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: