Desaster ku yobida di último simannan a laga atras

 

Willemstad, 24 di novèmber 2020

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di VVRP, señora Zita Jesus-Leito.

 

Danki pa e koperashon.

 

Atentamente,

 

Juniel Carolina

Parlamentario pa

frakshon di MFK

 

Minister di VVRP

Señora Zita Jesus-Leito
PRESENTE

Kòrsou, 24 di novèmber 2020

Tópiko: Desaster ku yobida di último simannan a laga atras

 

Señor Minister último dos simannan tras di lomba, Kòrsou a konosé vários dia di yobida fuerte. Práktikamente durante kasi dos siman, awa seru tabata kai di mainta te anochi, loke a trese no únikamente molèster pa habitantenan, pero a laga basta desaster atras ku nos kier a pidi Gobièrnu su atenshon.

 

Banda di e hecho ku e tera, dor di e kantidat di awa ku a bin ta kai a saturá a pone ku na vários kaminda riba nos isla ku palunan grandi a bini abou, tin vários siudadano ku ta reklamá di baranka riba barika di seru ku tabata los i a bini abou.

 

Suskrito mes den e dianan ku a pasa a bai tuma nota di  e situashon ku a surgi den Kura Piedra, kaminda den kurá di un habitante dje bario, por a mira kon barankanan tabata bini abou, dor ku e tera a bira moli.

 

Roinan ku mester sirbi komo un guia pa awa seru bai damnan, pero nos ta konstatá ku den e roinan ta tur na palu grandi i yerba i no papia mes di sushi ku práktikamente ta un opstákulo pa e awa por kana. Konsekuensia di esaki ta ku e ta subi bai haltu i drenta kura i kas di hende.

 

Un otro fenómeno ku nos a bin ta konosé den e dianan di hopi yobida aki ta ku kasnan a kuminsá basha den otro, pa motibu ku nan no por wanta mas awa. Tin vários ehèmpel den tantu Punda komo Otrabanda.

 

Por último nos kier mustra riba e tantísimo burakunan ku a bin aserka riba kareteranan rònt Kòrsou a konsekuensia di e palu di awa seru ku a kai i Gobièrnu su argumento di semper ta ku no tin sèn pa drecha e kareteranan

 

Hasiendo uso di artíkulo 96 di Reglamentu di órden di Parlamentu di Kòrsou, nos kier a hasi Minister Jesus-Leito e siguiente preguntanan:

 

1. Den Gobièrnu tin un fondo ku mester atendé ku kalamidat manera nos a kaba di deskribí ariba?

 

1. Si e kontesta ta si, di kuantu plaka e fondo aki tin aden i na ki momentu por hasi uso di dje?

 

1. Kiko Gobièrnu di Kòrsou ta konsiderá komo kalamidat pa asina por hasi uso di e fondo aki pa drecha e loke nan ku suskrito a deskribí ariba?

 

1. Si no ta eksistí un Fondo di Kalamidat, kiko Gobièrnu ta wardando pa krea un fondo asina?

 

1. Kua ta e plan konkreto ku Gobièrnu tin pa loke ta trata drechamentu di kareteranan ku ta den mal estado, barankanan na barika di seru ku ta biniendo abou i edifisionan monumental ku ta bashando den otro?

 

Sperando di por haña un kontesta den e tempu ku nos Reglamentu di órden ta preskribí, nos ta keda

 

Atentamente

 

Juniel Carolina

Parlamentario pa 

frakshon di MFK