MINISTER XIOMARA MADURO A RECONOCE BENJAMIN PICK – PROPIETARIO DI LA MODERNA PA SU PERSERVERANCIA Y CONFIANSA DEN ECONOMIA DI PAIS ARUBA
MINISTER XIOMARA MADURO A RECONOCE BENJAMIN PICK – PROPIETARIO DI LA MODERNA PA SU PERSERVERANCIA Y CONFIANSA DEN ECONOMIA DI PAIS ARUBA
Oranjestad – Durante di e evento di lansamento di e campaña Cumpra Local – di nos pa nos mes- Minister Xiomara Maduro a sorpende sr. Benjamin Pick, propietario di La Moderna cu un bunita reconocemento, como un comerciante cu den tempo bon y malo a keda den Caya G.F. Betico Croes di nos cuidad.
Benchi ta un ehempel pa entrepeneurnan
Minister Maduro a bisa cu tur hende conoce ‘Benchi’ of ‘Chipi Chipi’ di La Moderna cu tin hopi aña den Caya G.F. Betico Croes. Benchi a duna trabou na hopi yiu di tera y como un bon fanatico di baseball y di ‘Yankees’ semper Benchi a aporta na deporte di nos Pais. E mandatario a enfatisa cu Benchi ta un bon ehempel y inspiracion pa specialmente e entrepeneurnan, e comerciantenan nobo cu ta bay cuminsa cu nan negoshi. E dignatario a sigui bisa cu Benchi ta e pilar di ‘La Moderna’ cu ta un instituto den Caya G.F. Betico Croes. Na nomber di Gobierno di Aruba hunto cu Minister Andin Bikker, Minister Xiomara a otorga un bunita reconocemento na Benchi pa su perserverancia, su confiansa y su contribucion na desaroyo di economia di nos Pais.
Nos tin cu sigui positivamente padilanti
Den su discurso pa gradici Minister Xiomara Maduro, Benchi a enfatisa cu enberdad tempo ta duro aworaki, pero cu perserverancia y hopi dedicacion na su clientenan, su negoshi por a sigui draai. Benchi a subraya cu comerciantenan mester cumpli cu locual nan por y locual no por cumpli cune, pa spaar pa despues por cumpli cu nan responsabilidadnan. ‘Nos tin cu sigui positivamente padilanti’ Benchi a bisa.
Benchi a keda masha contento y a gradici Gobierno di Aruba specialmente Minister Xiomara Maduro pa e bunita reconocemento.
