Minister Xiomara Maduro ta informa: Gastonan di bienes y servicio a subi den aña 2018 debi na e situacion financiero di Serlimar, e caso di garantia di SACE, Green Corridor y pa lanta e Fondo di Crisis Social

 

Minister Xiomara Maduro ta informa:

 

Gastonan di bienes y servicio a subi den aña 2018 debi na e situacion financiero di Serlimar, e caso di garantia di SACE, Green Corridor y pa lanta e Fondo di Crisis Social

 

 

ORANJESTAD – E Cuentanan Anual di Pais Aruba di 2016, 2017 y 2018 ta mustra e desaroyo di e gastonan di gobernacion y nan efecto riba e saldo operacional. Pa locual ta trata e gastonan di bienes y servicio (goederen en diensten) mester remarca cu den aña 2018 esaki a subi substancialmente cu 19.4% na 188.2 miyon florin, despues cu na aña 2017 esaki tabata 168.8 miyon florin y na aña 2016 esaki tabata 162.2 miyon florin. E subida grandi aki ta debi na e gastonan cu Gobierno mester a haci pa manda extra placa pa Serlimar pa asina yuda e compania aki cu ta pasando den un situacion financiero hopi precario. 

 

Di otro banda tin tambe e gastonan relaciona cu e deslace final di e caso di garantia di SACE (Eagle Beach Resort) cu a keda paga na maart 2018 despues di 15 aña cu Aruba a paga pa e garantia aki duna bou Gabinete Henny Eman cu a costa nos Pais un total di 206 miyon florin. Den aña 2018 mester a cuminsa paga tambe pa e Green Corridor y DOW mester a haya mas fondo pa atende cu, entre otro, terenonan cu mester a wordo cumpra pa haci e caminda di Watty Vos Boulevard posibel. Banda di esaki Gabinete Wever-Croes mester a atende den aña 2018 cu e crisis social creciente na nos Pais y pa esaki mester a pone 18 miyon florin disponibel pa cubri e gastonan di e Fondo pa Crisis Social. Tur e gastonan incidental aki a afecta e saldo operacional den aña 2018. Tabata un aña cu mester a atende cu e crisis financiero, crisis social y obligacionnan financiero cu pa gran parti a wordo traha bou di otro gobernacion di nos Pais.