DESPUES DI EMANCIPATIE BOULEVARD DOMINICO DON MARTINA AWOR PARTI DI KAMINDA DI WEG NAAR WESPUNT I SCHOTTEGATWEG OOST TA HAÑA LUS LED INTELIGENTE

DESPUES DI EMANCIPATIE BOULEVARD DOMINICO DON MARTINA AWOR PARTI DI KAMINDA DI WEG NAAR WESPUNT I SCHOTTEGATWEG OOST TA HAÑA LUS LED INTELIGENTE

Willemstad- 11 di Desèmber 2020- Shòfùrnan ku subi riba Emancipatie Boulevard Dominico Don Martina (Nieuwe Haven) anochi lo nota un kambio grandi awor ku a instalá e lusnan LED inteligente riba e kaminda aki. Despues di a instalá e lusnan riba Emancipatie Boulevard Dominico Don Martina (Nieuwe Haven) awor ta toka turno pa parti di Schottegatweg Oost i Santa Rosaweg (altura di Zuikertuintje) i kaminda pa bai Banda Bou banda (altura di área di Zegu pa Groteberg). 

Djadumingu dia 13 di desèmber e trabounan lo tuma lugá na e parti di Schottegatweg Oost i Santa Rosaweg (altura di Zuikertuintje) i djamars 15 di desèmber lo kontinuá ku instalashon di lusnan LED riba kaminda pa bai Banda Bou (área di Zegu pa Groteberg). E trabounan djadumingu lo tuma lugá for di Argusweg na altura di Banco di Caribe te na rotònde J.M.G. Juancho Evertsz i tambe di e krusada di Schottegatweg Oost/ Santa Rosaweg te entrada di Mahaaiweg. Tene kuenta ku lo desviá tráfiko ku ta bon riba Schottegatweg Oost direkshon di Santa Rosaweg via Neptunisweg pa Santa Rosaweg. E parti paden di Schottegat Oost lo ta será pa tráfiko. E trabounan djamars dia 15 di desèmber lo tuma lugá for di rotònde na Zegu te na subida di seru na Grote Berg. Outomobilistanan mester tene kuenta ku parti di e kaminda lo ta será pa tráfiko.

Esaki ta forma parti di e pruebanan ku Aqualectra i Ministerio di Tráfiko, Transporte i planfikashon Urbano ( VVRP) ta hasiendo pa den un futuro serkano kubri tur karetera di Kòrsou ku lusnan aki di futuro. E lusnan LED no solamente lo garantisá un intensidat di lus mihó i konsistente riba kayanan na Kòrsou, pero tambe uso di koriente i mantenshon di e ret di lus lo ta muchu mas efisiente, dor ku Aqualectra ta risibí notifikashon instantáneo ora un lus no ta funshonando adekuadamente.

Aqualectra i Ministerio di Tráfiko, Transporte i planfikashon Urbano ( VVRP) ke gradisí komunidat pa e komprenshon i koperashon durante di e dianan ku e trabounan a keda realisá riba Emancipatie Boulevard Dominico Don Martina (Nieuwe Haven) i ta konta ku komunidat su koperashon i komprenshon pa por finalisá ku instalashon di e lusnan den e área di Schottegatweg Oost i Santa Rosaweg i kaminda pa bai Banda Bou. 

 

This site uses Akismet to reduce spam. Learn how your comment data is processed.

%d bloggers like this: