INVESTIGASHON DI AQUALECTRA TA DUNA INDIKASHON DI E POSIBEL KOUSA DI BLÈKOUT,

KOMUNIKADO DI PRENSA

INVESTIGASHON DI AQUALECTRA TA DUNA INDIKASHON DI E POSIBEL KOUSA DI BLÈKOUT,

PENDIENTE KONKLUSHON

Willemstad 17 di desèmber 2020- Aqualectra a sigui hasi análisis di e blèkoutnan di último simannan huntu ku ekspertonan lokal i internashonal. Den e kuadro aki ta analisando tres (3) ángulo ku ta determinante pa suministro di energia. E tres ángulonan di análisis ta demanda, frekuensha riba e ret i por último ta vòltahe. E investigashon ta konkluí ku demanda i frekuensha ta mustra un patronchi nòrmal. Abase di análisis ku a wòrdu hasi, na momento di e blèkout, por a saka afó ku e vòltahe riba tur nivel tabata fluktua inmensamente. Aqualectra ta hasiendo su máksimo esfuerso pa haña e kousa rais di esaki. Pues ainda no por duna garantia ku e situashon di blèkout lo por bolbe ripití, pero ta yegando hopi serka pa determiná kiko por ta kousante di esaki.

Investigashon di tres komponente
E promé komponente investigá pa Aqualectra ta demanda. Aqualectra a analisá e demanda na momento ku e blèkoutnan a tuma lugá i ta konstatá ku esaki su patronchi ta unu nòrmal. Pues den e kuadro aki, no mester sigui hasi muchu análisis mas den e área aki, paso e chèns ku e kousa di e blèkout ta sintá na kambio den demanda ta mínimo pa no pone nihil.

E di dos (2) komponente ta e frekuensia. Kòrsou su sistema ta basá riba 50 siklo (Hz). Esaki por varia dentro di límite, pero no pafó di e límitenan stipulá. Algu promé ku e blèkout, i despues di e blèkout, a tuma nota ku e frekuensia tabata fluktua pafó di e límite. A pone atenshon riba esaki mesora i a solushoná esaki. Na e momentonan aki, e frekuensia ta fluktua dentro di e márgen.

E di tres (3) komponente ta e vòltahe. Na instalashon di nos klientenan nos suministro ta 12/220 òf 230/380. Tin algun kliente ku ta risibí suministro na 12,000 vòlt. Segun análisis ku a keda hasí, na momento di e blèkout, e vòltahe riba tur nivel tabata fluktua inmensamente. E fluktuashon tabata di tal manera, ku e sistema di protekshon a wòrdu aktivá i kousa e blèkoutnan. Aqualectra ta analisando kiko por ta e kousa di e fluktuashon aki. Ainda no a haña e rais di e kousa, di moda ku no por duna garantia ku e situashon di blèkout lo no por bolbe ripití.

Aqualectra ta sigui hasi máksimo esfuerso
Aqualectra ta hasiendo su máksimo esfuerso pa por remediá e situashon aki mas pronto posibel, pero adelantá ta pidi komprenshon i diskulpa si algu asina ripití miéntras ta solushoná e problema.

-FIN-