75 Kursista di IPE a sertifiká pa kurso di Hydroponics i Syntropic Farming
75 Kursista di IPE a sertifiká pa kurso di Hydroponics i Syntropic Farming
Willemstad, 20 di Desèmber 2020 – Institute for Professional Excellence (IPE) den su afan pa prepará gruponan grandi den nos komunidat pa e trabounan práktiko ku ta presentando nan mes den futuro pa medio di kurso grátis i sosten, resientemente a fasilitá e kursonan di agrikultura modèrno ‘Hydroponics’ i ‘Syntropic Farming’. Minister di Salubridat Públiko, Medio Ambiente i Naturalesa, sra. Zita Jesus-Leito, huntu ku bestür di IPE, a otorgá sertifikado na 75 kursista, pa medio di un evento seremonial ‘Drive-thru’ pa selebrá nan logro i duna e kursistanan e empuhe pa nan sigui desaroyá nan mes den e sektor di Agrikultura.
“Nos afan komo Gobièrnu di Kòrsou, huntu ku IPE, ta pa krea, fasilitá i guía empresarionan nobo den mundu di agrikultura, stimulá desaroyo di e sektor kaminda ta kultivá, bende, i asta eksportá produktonan lokal, i kontribuí na rekapasitashon di e forsa laboral di Kòrsou. Pero ta e perseveransha, esfuerso i abilidat pa gara oportunidat i pa sigui e kursonan di agrikultura modèrno, ta e lokual ta hasi e kursistanan aki prepará pa é trabounan di futuro!”, tabata e mensahe ku Minister di Salubridat Públiko, Medio Ambiente i Naturalesa, sra. Zita Jesus-Leito a duna e kursistanan durante e evento drive-thru. Institute for Professional Excellence e aña aki a fasilitá un kantidat di kurso grátis, entre otro den e areanan di agrikultura i enseñansa modèrno, i alabes ta sostené e kursistanan ku guía pa por lanta i mantené nan mes empresa den e sektor aki.
Desaroyo duradero di agrikultura, krio di bestia i peska
Gobièrnu di Kòrsou na 2017 den su nota di maneho ‘Na kaminda pa desaroyo duradero di agrikultura, krio di bestia i peska’ ta referí na su afan pa remplasá importashon di produktonan ku por produsí lokalmente pa 5% pa aña, durante 5 aña. Pa por akapará e nesesidat di komunidat i ekipá esnan ku lo ke drenta e sektor aki, Ministerio di GMN a aserká Institute for Professional Excellence pa krea e kursonan nesesario pa por atraé i prepará mas hendenan lokal pa e nesesidatnan di komunidat i e trabounan ku esaki lo krea den futuro.
E aña aki instituto IPE a lansa diferente kurso, entre otro e kursonan Hydroponics i Syntropic Farming.
Un gran kantidat di persona a inskribí pa medio di website www.ipe.cw, i a base di esaki IPE ta selektá e partisipantenan segun nan interes i potenshal pa por subi merkado despues di partisipashon na e kurso.
E kurso grátis ta konsistí di un parti teorétiko ofresé den kolaborashon estrecho ku e fakultat di ‘Food and Agriculture’ di ‘University of the West Indies’ (UWI) situá na Trinidad & Tobago.
E kursonan ta konsistí di materia relatá na; desaroyonan modèrno den agrikultura; kultivá kosecha pa medio di hidroponia den espasionan será òf Syntropic Farming; sistema i ekiponan modèrno pa elevá efisiensia i protehé plantashon; aspektonan relatá na maneho, finansia, i merkadeo; i hopi mas. Tambe e kursistanan ta risibí sosten pa por yega na tereno, fasilidatnan pa realisá plantashon, i guía pa lanta i mantené nan negoshi komo empresario nobo.
IPE: preparando pa trabounan di futuro
IPE tin komo mishon pa ofresé kurso i training ku por prepará gruponan grandi den nos komunidat pa e trabounan práktiko ku ta presentando nan mes den futuro. IPE ta kargá pa Bureau Telecommunicatie en Post, Aqualectra, SOAB i CHATA. Banda di agrikultura modèrno, IPE ta enfoká tambe riba preparashon pa trabounan práktiko di futuro ku lo ta nesesario den entre otro e area di téknologia, IT, energia duradero i negoshi di kose paña. Pa medio di wèpsait http://www.ipe.cw lo informá tokante oportunidatnan ku lo sigui ofresé.