Minister di Enseñansa a entregá plan di akshon pa evaluashon di Enseñansa

Minister di Enseñansa a entregá plan di akshon pa evaluashon di Enseñansa

 

Willemstad 20 di desèmber 2020 

Konforme palabrashonnan hasí entre Gobièrnu di Kòrsou i Ministerio di Asuntunan  Interno i Relashonnan di Reino (BZK/RMR), e promé akshon ku mester a keda tumá ta entrega di un plan di akshon pa evaluashon di Enseñansa den konsepto. 

Minister di Enseñansa, Siensia, Kultura i Deporte (ESKD) Sr. Steven Croes despues di su huramentashon a pone komo prioridat traha riba e plan di akshon aki. Pa realisá e meta prioritario aki, Minister Croes a instituí un grupo di trabou, konsistiendo di diferente eksperto riba tereno di Enseñansa, Siensia i investigashon, inkluso representashon di eksperto di Inspekshon di Enseñansa, departamentu di maneho i sektor Enseñansa i Siensia. E trabounan a kana na un forma profeshonal i e konsepto a keda entregá konforme palabrashon. 

Konsiderando e importansia di Enseñansa di kalidat pa un pais, Minister Croes a skohe pa un evaluashon amplio di Enseñansa, for di evaluashon di kalidat di aktividat edukativo den klas te na nivel institushonal. Pues e proposishon ta inkluí evaluashon di kalidat di maestro, liderato edukashonal, forsa di maneho i atministrashon riba nivel di direktiva di skol, pero tambe riba nivel di e sektor. Meta di esaki ta pa riba tur nivel garantisá mehorashon di kalidat na un forma duradero i sostenibel. Meskos ta konta pa e invershonnan den infrastruktura. E enfasis ta riba invershonnan duradero i sostenibel. Pais Kòrsou mester tin e kapasidat i forsa finansiero pa mantené tur invershon hasí. Asina Minister Croes ta empeñá i perkurá pa hasi impakto ku karakter duradero, ku bista riba un futuro briante pa e generashon aktual i esunnan ku ta sigui.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: