Proposishon pa Selikor duna tempu di grasia pa tira sushi afó

Proposishon pa Selikor duna tempu di grasia pa tira sushi afó

Willemstad- Parlamentario Calmes i tambe Almier Godett ta di opinion ku SELIKOR mester por duna un tempu di grasia na esnan ku ta basha sushi afó na Landfill. Resultado di e akshon aki sigur lo ta na benefisio di Kòrsou i tambe Selikor.

Ta un tradishon ku nos pueblo ta drecha kas, limpia kura i produsí mas sushi durante e dianan di fiesta. Dimes pueblo kier deshasí di e sushi aki mas práktiko posibel. Calmes i Godett a tuma nota di e situashon ku a bini ta tumando lugá na entrada di Selikor espesialmente den e temporada di aki. Tur vehíkulo konteniendo sushi di kas i tambe esnan di kontratista chikí mester pasa via mesun entrada pa pisa e sushi riba e balansa. E proseso aki ta tumando asina tantu tempu, dor dje trabounan di yena i firma formulario, resultando den filanan largu te riba kaya. Pa kolmo mayoria usuario ku ta trese e sushi di kas no ta pasa e 1000Kg ku nan tin derechi riba dje. Aparentemente e filanan largu i pèrdèmentu di tempu na entrada ta desenkadena den bashamentu di sushi otro kaminda kreando bista nan mahos pa Kòrsou. “E situashon ta alarmante”; sigun Calmes. Un karta pa Minister Jesus-Leito, enkargá ku Selikor, lo sali mesora pa proponé e solushon aki.

Un tempu di grasia lo aliviá Selikor di su propio problemanan aktual ku ta e retraso den kuementu di sushi i vários “truck” ku no ta funshoná.  Godett:”Trabou tin i nos tur ke un Kòrsou limpi”.