Minister Plenipotenciario di Aruba na Washington DC, Joselin Croes: ARUBA A WORDO PONI RIBA E LISTA DI PAISNAN LATINO AMERICANO Y CARIBENSE PA HAYA SCHOLARSHIP DEN E FORMA DI “IN-STATE TUITION FEE”.

Minister Plenipotenciario di Aruba na Washington DC, Joselin Croes:

ARUBA A WORDO PONI RIBA E LISTA DI PAISNAN LATINO AMERICANO Y CARIBENSE PA HAYA SCHOLARSHIP DEN E FORMA DI “IN-STATE TUITION FEE”.

Durante e bishita di trabou di e Minister Plenipotenciario di Aruba na Washington DC, Joselin Croes, na Tallahassee, hunto cu su coleganan di embahadanan, a reuni cu Marshal Criser III, Chancellor, Vikki Shirley, General Counsel y Crysty England, International Affairs, tur miembro di State University System of Florida y nan a comprati cu nos e grato noticia cu Aruba a wordo inclui riba e lista di paisnan Latino Americano y Caribense cu por bin na remarca pa un scholarship den e forma di “in-state tuition fee”.

Conforme Section 7(d), Art. IX, Fla. Const.: Sections 1009.21 and 1011.43, Florida; History, studiantenan di Aruba cu kier bay studia na un di e 12 Universidadnan cu ta cay bou di Florida State Universities, por wordo otorga un scholarship dependiendo di nan cijfers, actividadnan extra curicular, excelencia den deporte y of otro merito.

Bo mester ta un residente di Aruba pa bo por bin na remarca pa e scholarship aki. E scholarship otorga por wordo kita si e studiante no ta cumpli cu e standard academico cu e Universidad ta exigi. E studiante Arubiano cu logra haya e scholarship lo wordo considera igual na un residente di Florida pa cual motibo e lo bin na remarca pa e prijs cu un residente lo paga pa su estudio na Florida.

E prijs aki mayoría biaha ta 50% te cu 70% mas barata cu e prijs cu un studiante internacional ta paga ora nan bay e universidadnan aki. E prijs pa residente pa mayoria di e scolnan aki ta core entre USD 4.000,00 – USD 6.500,00 pa aña. Banda di esaki e gastonan pa vivienda (room & board) ta core entre USD 9.500,00 – USD 12.000,00 pa aña. Gastonan di buki, trasportacion y seguro ta core entre USD 4.500,00 – USD 6.500,00 pa aña. Na un averahe total di mas o menos USD 21.000,00 pa aña.

Conforme e reglanan di prestamo pa studiantenan di Aruba, cada studiante lo por bin na remarca na un maximo di AWG 140.000,00 pa nan estudio completo, parti den parti cada aña. E prijsnan aki ta haci’e posibel pa mas studiante por bin studia na Merca, sin cu e tin extra gasto pa e mayornan.

Segun estadistica di aña 2016, di tur e studiantenan cu ta bay studia na Hulanda solamente 20% ta gradua nan Universidad y di e grupo ey solamente 5% ta bolbe Aruba. Motibo pa esaki ta cu door cu nan tin paspoort Hulandes ta mas facil pa nan haya trabou na Europa y eynan nan ta wordo paga den euro’s cual ta haci’e mas atractivo. Motibo pa cual mayoría no ta caba ta cu e sistema di educacion ta mas academico y menos practico den comparacion cu e sistema mericano. Di e total di mas o menos 80 studiante cu ta bin studia na Merca tur aña, 95% ta gradua y mayoría di nan ta bolbe bek Aruba. Florida semper tabata e destinacion favorito pa studiantenan di Aruba paso e ta cerca e tin mes un tempo cu Aruba y e ta un estado economico pa biba.

E scolnan cu ta resorta bou di e State University System of Florida ta Florida A & M University, Florida Atlantic University, Florida Gulf Coast University, Florida International University, Florida Polytechnic University, New College of Florida, University of Central Florida, University of Florida, University of North Florida, University of South Florida, University of West Florida. Tur ta universidadnan reconoci internationalmente cu mas di 10.000 studiante cada uno.  Mi taba’tin e placer di a bishita FIU y FAU y tur dos ta hopi interesa pa ricibi mas studiante di Aruba na nan Universidad. Tambe mi a discuti cu nan posibel partnerships pa research, student exchange y summer programs.

Na tur studiante cu ta interesa den mas informacion nan por tuma contact libremente cu mi persona na Embahada di Reino Hulandes na Washington DC na 2022742610 of joselin.croes@minbuza.nl.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: