CURINDE I CINEX TA FIRMA AKUERDO PA ESTRECHÁ ESFUERSONAN PA ATRAÉ I SOSTENÉ INVERSHONISTANAN

CURINDE I CINEX TA FIRMA AKUERDO PA ESTRECHÁ ESFUERSONAN PA ATRAÉ I SOSTENÉ INVERSHONISTANAN

Willemstad, 27 di Desèmber 2020 – Curaçao Industrial and International Trade Development Company N.V. (Curinde) i Curaçao Investment & Export Promotion Agency (CINEX) a firma un akuerdo di intenshon pa asina uni forsa i aliñeá esfuersonan pa por atraé i sostené invershonistanan ku ta interesá den invertí na Kòrsou en general, pero spesífikamente den zonanan ku Curinde ta manehá.  Dor di kombiná i alineá esfuersonan di Curinde i CINEX, ta krea mas efektividat i efisiensha ora ta atraé i fasilitá invershonistanan tantu lokal komo internashonal, i por traha mas dirigí riba sierto industria i kompanianan ku ta trese aktividat ekonómiko sostenibel pa nos isla.

Curinde i CINEX ta uni forsa pa speshalmente enfoká riba atraé invershonistanan ku ta entre otro produsí sostenibel òf ku ta komersialisá produktonan di balor haltu. E kombinashon di esfuersonan mester kondusí tambe na baha e asina yamá ‘red tape’. Curinde su parkenan, ku e infrastruktura ya na lugá, ta sirbi nèt bon pa asina e invershonista por yega i kuminsa su empresa.  Banda di esaki, Curinde ta optimalisando su plataforma di e-commerce pa asina e komersiantenan por hasi uso di un plataforma ku ta kumpli ku e stándartnan internashonal haltu.

“Éksito di nos zonanan, sea ekonómiko òf industrial, ta dependé di e esfuerso di tur envolví. P’esei e akuerdo ku nos a yega na dje ku CINEX ta importante pa fasilitá e parti di atraé establesementu di empresanan den nos parkenan.  Komplementando otro nos por ta mas efektivo i efisiente den sirbi esnan interesá pa kuminsá un empresa sostenibel na Kòrsou i partikularmente den nos parkenan.”, asina Sra. Jacqueline Jansen, Gerente General di Curinde, a splika.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: