Fin di anja ku Restaurant Nultwintig
Corona vírùs a impaktá henter mundu i nos dushi Kòrsou tambe ta den un krísis. Hopi hende a pèrdè nan trabou i no sa kon lo sigui ku esaki den futuro. Nos tur sa kiko ta nifiká di no tin trabou i seguridat i kiko tur e konsekuensianan esaki por trese kuné. Den e periodo difísil aki nos mester yuda otro i ta mas uní ku otro: ‘luchando huntu i yudando otro, nos ta mas fuerte i lo bai dilanti: “Standing Strong Together”.
Standing Strong Together ta un proyekto ku a kuminsá djasabra 2 di mèi 2020, danki na un persona ku finansieramente ta bon pará i ku kier keda anónimo, huntu ku e Restorant Nultwintig, pa yuda habitantenan di e bario Nieuw Nederland i Zeewijk. Tres biaha pa siman i shete siman largu habitantenan di e bario Nieuw Nederland i Zeewijk por a disfrutá di nan kuminda y asinaki Restaurant Nultwintig a yuda e bario ku nos tambe ta forma parti di dje pa sikiera suavisá e karga di kada famia.
E biaha aki nos no a lubidá nos bario i kier a hasi un bon gesto den temporada di pasku. Pesei nos a disidí di parti entre 300 pa 400 kuminda pa nos bario. Tambe nos a hiba kuminda pa e grandinan na kas. Lógikamente sin partner òf spònsor esaki no ta posibel, pesei nos ta yama danki na Vishon, Infinity Group Curaçao, Coca Cola, Firgos, Event Services, T Experience, Curadoet. Y atrobe un persona finansieramente stabil i ku kurason pa e bario Nieuw Nederland i Zeewijk ku kier keda anónimo a regla pa tur mucha ku a bini por a haña nan regalo di pasku.
Tambe nos a tene kuenta ku higiena i medidanan di seguridat ora ta prepará i saka e kuminda i ora e habitante bin buska nan kuminda. T Experience konhuntamente ku nos kompania di seguridat a regla pa tin sufisiente distansia sosial.
Luchando huntu i yudando otro, nos ta mas fuerte i lo bai dilanti. Nos mester kwida loke nos tin i kada kos chikí ta yuda pa bira algu grandi.
Team Restaurant Nultwintig