Adaptashon den areglo di stazje pa alumnonan den Enseñansa Sekundario

Adaptashon den areglo di stazje pa alumnonan den Enseñansa Sekundario

Geplaatst op 29 December 2020 dor di Ministerio Enseñansa, Siensia, Kultura & Deporte

WILLEMSTAD – For di e punto di salida ku ningun alumno no por keda perhudiká, a yega na e desishon ku na momentu ku no ta posibel pa un alumno kore stazje (kompleto) òf hasi su práktikanan nesesario, skol den palabrashon ku direktiva di skol mester duna e alumno un tarea alternativo pa por desaroyá e parti práktiko di e estudio. E kambio aki di areglo di stazje ta speshalmente pa alumnonan di VSBO(PKL/PBL) pa e aña eskolar 2020/2021.

Konforme e lei di enseñansa sekundario, e enfoke ta pa kada alumno kore stazje i hasi su práktikanan nesesario segun su kuríkulo. Despues di vários deliberashon i investigashon, pero tambe teniendo kuenta ku e retonan di Covid-19 na Kòrsou, Ministerio di Enseñansa, Siensia, Kultura i Deporte (ESKD) a konkluí ku mester trese un kambio den kuadro di e areglo pa stazje.

Ta un echo ku e krísis di Covid-19 tin su impakto riba e trayekto di stazje i práktika pa alumnonan den enseñansa sekundario. Entre otro, e medidanan di prekoushon vigente i e kapasidat i disponibilidat limitá di kompania i organisashonnan ta motibu pa trese un kambio den e maneho di stazje.

Ministerio di Enseñansa, Siensia, Kultura i Deporte i Sektor di Enseñansa i Siensia ta informá tur aktornan envolví di e desishon. Direktivanan di skol huntu ku skolnan sekundario ta sigui informá mayor i alumnonan di e adaptashon. Tambe ta manda e protokòl adaptá pa tur skol pa hasi e kambionan nesesario. Pa kualke pregunta adishonal por tuma kontakto direktamente ku e skolnan i/òf direktivanan di skol. Si ta nesesario por manda un mail pa Ministerio di ESKD na: OWCS.Communicatie@gobiernu.cw.