Prome Minister Evelyn Wever-Croes: INAUGURACION DI OFICINA NOBO DI STICHTING BOB “Cada hende muhe mester tuma control riba nan propio salud y haci uzo di e servicio cu BOB ta Brinda” 

Prome Minister Evelyn Wever-Croes:

 

INAUGURACION DI OFICINA NOBO DI STICHTING BOB

“Cada hende muhe mester tuma control riba nan propio salud y haci uzo di e servicio cu BOB ta Brinda” 

 

Diamars mainta, Prome Minister Evelyn Wever-Croes tawata presente na e inauguracion di e oficina nobo di BOB cu awor ta ubica cerca di HOH. Den su discurso na e inauguracion, Prome Minister a gradici Stichting BOB pa e trabou y esfuersonan cu nan ta haci pa brinda e sernan femenino un miho calidad di bida. 

 

Stichting BOB a cuminsa cu un soño y un grupo di hende cu tawata tin e vision di traha riba prevencion y investigacion. Na comienso e tawata un reto grandi pa motibo cu no tawata tin fondo disponibel, pero mirando awe tur e logronan, ta un indicacion cu soñonan por bira realidad si tin un plan, determinacion y pasion pa yega na un meta. 

 

Premier Wever-Croes den nomber di Gobierno a expresa gratitud y ta felicita e ekipo completo pa tur e trabounan cu a bin ta eherciendo desde comienso. 

 

BOB tin plannan pa sigui expande investigacion den otro ramonan tambe. Prome Minister tin tur confiansa cu BOB lo logra cosnan grandi mirando te na unda nan a yega caba. 

 

“Examinacion di pecho ta hopi importante pa grantisa salud di e sernan femenino. Pa e motibo aki mi ta urgi tur ser femenino, mama y welanan pa haci uzo di e facilidad y servicionan aki. Haciendo screening cada dos aña por yuda detecta si tin algo, y si tin algo e chensnan ta mas grandi cu e lo por wordo trata na tempo”, Prome Minister a expresa. 

 

Stichting BOB ta na dispocion di un y tur. Prome Miniser ta haci un apelacion na cada hende muhe pa tuma control riba nan propio salud y haci uzo di e servicio cu e team di BOB ta brinda.