INSTITUTE FOR PROFESSIONAL EXCELLENCE TA OFRESÉ OPORTUNIDAT PA KURSO BÁSIKO DI PRODUKSHON DI PAÑA I MODA I INTRODUKSHON NA INDUSTRIA DI FABRIKASHON

INSTITUTE FOR PROFESSIONAL EXCELLENCE TA OFRESÉ OPORTUNIDAT PA KURSO BÁSIKO DI PRODUKSHON DI PAÑA I MODA I INTRODUKSHON NA INDUSTRIA DI FABRIKASHON

Willemstad 25 di Yanüari 2021 – Institute for Professional Excellence (IPE) ta ofresé un oportunidat úniko na personanan interesá pa partisipá i haña konosementu básiko di produkshon di paña i moda i e industria di fabrikashon.  E kurso ku ta dura 10 siman lo keda duná pa e eksperto lokal  D’Loran.  Pa medio di e kurso aki e kursistanan lo siña e fundamentunan di kosementu di modèlnan di por ehèmpel karson, blusa, saya i shimis. Den e kurso tambe lo trata e materia relatá na kon pa manehá bo propio atelier òf fabrika chikí, ku e ophetivo pa bo negoshi ta unu éksitoso den un industria ku ta kambia kada dia di nobo.  Inskripshon ta posibel via di e portal riba IPE.CW te ku dia 4 di Febrüari.  E kantidat di persona ku pa grupo por partisipá ta limita.  Ku e kurso aki IPE ta kontribuí na komunidat for di un otro ángulo. E kurso di IPE ta duna más hende e oportunidat pa, banda di siña un habilidat, tambe lanta nan mes empresa chikí, ku kual nan por perkurá pa nan propio bienestar i kisas asta krea kupo di trabou.

E kurso aki ta speshalmente pa personanan ku ta interesá pa kuminsá nan propio negoshi den fabrikashon di paña.  E enfóke ta riba produkshon di unifòrm pa por ehèmpel skol, ofisina, instanshanan di kuído, industria di hòspitalidat i organisashon hudisial.  Un introdukshon den kon hasi negoshi internashonal den e industria aki tambe ta forma parti di e kurso.  Pa por partisipá na e kurso bo mester tin 18 aña di edat òf mas, tin un edukashon mínimo di VSBO, mester dominá matemátika, mester por komprondé Ingles, Ulandes i Spaño banda di Papiamentu i tin akseso na un mashin di kose portatil.  Riba IPE.cw por yena e formulario di registrashon indikando ku tin interes pa e kurso. Un kombersashon di evaluashon ta parti di e proseso di selekshon.  Pa mas informashon por manda un e-mail na info@ipe.cw.

IPE di e forma aki ta kumpli ku su mishon pa ofresé kurso i training ku por prepará gruponan grandi den nos komunidat pa e trabounan práktiko ku ta presentando nan mes den futuro. E kursonan ku IPE ta ofresé ta enfoká riba trabounan di futuro den e areanan agrikultura modèrno, IT, energia duradero i pa medio di e oportunidat mas resién: e kurso aki básiko di produkshon di paña i maneho di bo propio negoshi di kose paña. IPE ta kargá pa Bureau Telecommunicatie en Post, Aqualectra, SOAB i CHATA. Pa medio di wèpsait http://www.ipe.cw lo informá tokante oportunidatnan ku lo sigui ofresé.