Ishahier Monte, su soño riba e bario ideal

Ishahier Monte, su soño riba e bario ideal

Ishahier Monte ke sigui diseñá e bario ideal pa habitante nan di Kòrsou. Manera ya a wòrdu menshoná un di e áreanan ku pa Ishahier i MFK ta importante ta e área sosial.

E área sosial aki pa Ishahier i MFK ta un di e parti nan fundamental ku mester traha riba dje pa mehora pais Kòrsou. Pa hasi esaki Ishahier i MFK ta haña e parti di desaroyo di bario hopi importante i esaki mester kana sam sam ku enseñansa, mirando ku despues di skol bo ta bai bèk den bo bario.

Pa logra esaki nos mester hasié huntu i nos ta haña ta importante pa hinka e trahadó sosial den bario i traha riba lidernan di bario kaminda Gobiernu tin mas konekshon ku e bario i famia. Tin espasio pa skuchá i yudá di un forma mas direkto. Lo bai tin mas kontrol di problemanan den bario i tambe pa e parti di vigilansia den bario.

E trahadó sosial ta dispone di e abilidat pa dirigí hóbennan den bario kaminda lo empoderá nan pa medio di aktividat, guia i apresio. Kòrsou su bario nan lo mester ta bon ekipá i ku fasilidatnan aksesibel pa tur habitante, for di esun di mas chikí te na esun di mas grandi, esun desabilitá i tambe nos grandi nan. Mester desaroyá kancha nan deportivo i duna balor i importansia na nos sentro nan di bario ku mester ta multifunshonal, esaki konforme e plan pa desaroyo di barionan ku MFK a lansa for di 2012.

Trese tur organisashon di e mesun bario huntu i krea un organisashon ku lo traha na bienestar di e bario dirigí dor di gobiernu. Trahadó sosialnan ta un instrumento importante den un bario, pero nos ta tuma nota ku pa hopi aña kaba gobièrnunan di turno a saka trahadónan sosial for di bario ku resultado ku no tin e parti sosial den bario mas, sifranan di “dropout” a subi, famianan kibra den bario i sin duda pobresa a oumentá te na alrededor di 60% den barionan.

P’esei ami Ishahier Monte ta boga pa bin ku trahadó sosial bek den barionan kaminda nos por resolvé problemanan di e barionan i trese bek konvivensia i harmonia bek den nos barionan.

Saludo,

Ishahier Monte

This site uses Akismet to reduce spam. Learn how your comment data is processed.

error: Content is protected !!
%d bloggers like this: