Dia di Betico 2021 MANA a sigui educa y informa publico

Dia di Betico 2021 MANA a sigui educa y informa publico

Compara cu 2020 y añanan prome Museo Arqueologico Nacional Aruba (MANA) tabata hopi trankil riba  Dia di Betico 2021.  Ta bisto cu e pandemia Covid-19 tin su efecto riba bida diario, tambe riba e dia nacional aki. E bentaha pa e bishitantenan e aña aki tabata cu e arkeologonan Harold Kelly y Raymundo Dijkhoff por a duna splicacion amplio di e periodo di e prome habitantenan di Aruba. A splica entre otro e motibonan pakiko ta yama e periodo aki awor e “Periodo Arcaico”.

Den pasado a haya ceramica na sitionan arkeologico manera Daimari y Spaans Lagoen. Pero tabata relaciona nan cu actividad di habitantenan di Periodo Ceramico. Door di uzo di tecnologia y metodonan inovativo a keda comproba cu e ceramica haya na Spaans Lagoen tabata pertenece na e prome habitantenan di Aruba.  Spaans Lagoen ta e sitio na unda probablemente e prome habitantenan di Aruba a yega. Den sala di exposicion permanente a instala 2 paneel cu ta duna mas informacion di e sitio arkeologico signicativo aki pa nos isla. 

Tabata tin bishitante cu a bin specialmente pa e exposicion temporario “Lasonan Caribeño”. E exposicion internacional aki ta conta di nos herencia comparti cu Caribe. Den mes exposicion ta indica tambe cu mester re-evalua e periodo defini como Pre-Ceramico y categorise como periodo Arcaico. Intencion di MANA ta pa hiba e exposicion temporal aki na distritonan di Aruba den e siguiente lunanan. 

Bishitantenan ta bon bini na MANA di dialuna pa diabierna di 9.30’or di mainta pa 4.30 di atardi. Tur bishitante mester cumpli cu e reglamentonan vigente en conexion cu Covid-19. Sigui nos riba Facebook Museo Arqueologico Nacional Aruba y National Archaeological Museum Aruba pa keda na altura di nos actividadnan planea pa 2021

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: