Produkshon di Nos Mes Kuminda ta haltu riba Agènda di PIN, Pero, tur hende mester komprondé esei i kumpli si

Partido Inovashon Nashonal a pone desaroyo di agrikultura, krio di bestia i peska haltu riba agenda polítiko for di 2017 ora a yega na un akuerdo di gobernashon. Durante e periodo ku sra. Suzy Camelia-Römer abata minister, diferente aspekto di e maneho a ser ehekutá, entre otro a stimulá konsumo di produkto lokal, training avansá riba diferente método moderno di agrikultura i peska, ampliashon di e posibilidatnan pa fiansa for di Fondo Agrario, ehekushon di diferente métodonan di prueba, manera kultivo sin suela, lombrikultura, permakultura i agrikultura sintrópiko. Ehekushon di e maneho, manera PIN a desaroyé, lo nifiká ku mas ku 200,000,000 mion florin ta keda lora den nos ekonomia den saku di e agrikultor, kriadó di bestia i piskadó mientras preis di kuminda lo baha.

 

Sinembargo, algun fasilidat ku ta urgente i nesesario pa por stimulá produkshon lokal a keda pegá serka mandatarionan di otro karteranan. Sra. Suzy Camelia-Römer na momentu ku e mester a interumpí trabounan importante pa pais na yuli 2020, a laga atras serka su kolega di Desaroyo Ekonómiko un konsepto di dekreto pa introdukshon di un tarifa hopi redusí di awa pa agrikultura. Despues di mas ku seis (6) luna, ainda agrikultornan no por gosa di e fasilidat ey. Probablemente urgensha pa atendé nos mes asuntunan pa hendenan lokal por haña oportunidat di krese no te’i. Kisas ta wardando riba otronan pa bin planta aki i manda sen afó? Ta bon konosí ku un tarifa abou di awa ta kontribuí na prèis di bèrdura i fruta mas barata pa e konsumidó lokal, pero tambe ta oumentá e produkshon di kuminda fresku. Pues salú di hende tambe ta ser sirbí ku un preis redusí di awa pa agrikultura.

 

Meskos ta konta pa un proposishon konkreto ku a manda na e mesun ministerio di Desaroryo Ekonómiko pa amplia e lista di fruta i bèrdura ku ta ser protehá, pa asina sigurá ku e produkshon lokal no mester kompetí ku importashon menos fresku i den hopi kaso mas karu pa e konsumidó. E proposishon ey tambe ta parse di a disparsé den lachi na e ministerio ku mester sòru pa ekonomia move.

 

Un otro aspekto ku ta stanka desaroyo di agrikultura i krio di bestia lokal ta otorgamentu di tereno. Konforme EOP tin 2,000, esta 20,000,000 meter kuadrá di tereno destiná pa agrikultura i krio di bestia. Ta tristu konstatá ku na final di e periodo di gobernashon aki e ministerio di Tráfiko, Transporte i Planifikashon Urbano ainda no a haña ta nesesario i urgente pa parti tereno pa e finnan aki. Ta manda un invershonista bai akudí na tereno privá pa tereno pa krio di baka pa produkshon di karni, mientras gobièrnu mes ta disponé di tereno pa esaki. 

 

Tambe, ta parse ku ainda no ta den tur seno di gobernashon nos ta realisá ku e fasilidatnan pa e agrikultor i kriado di bestia ta nifiká entrada pa nos hendenan i mas kupo di trabou. PIN ta duna hopi prioridat na e oportunidatnan ku agrikultura, krio di bestia i peska ta brinda. Otronan ku no ke keda atras a bin ta añadi esaki riba foyetonan di kampaña, pero ta karesé di determinashon i hendenan dotá pa realisá e maneho. PIN ta sigurábu ku nos mes ke i nos mes por! Den esaki PIN lo bai mas leu ku supsidio pa pone e industra agropekuario riba mapa permanentemente.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: