Partido MAN ta postulá sra. Giselle Mc William komo Minister di Desaroyo Ekonómiko.

Partido MAN ta postulá sra. Giselle Mc William komo Minister di Desaroyo Ekonómiko.

Willemstad, 27 di ougùstùs 2019.

Komo partido polítiko ku ta forma parti di Gobièrnu di Kòrsou, Partido MAN a skohe pa postulá sra. Giselle Mc.Willliam ku aklamashon general komo Minister di Desaroyo Ekonómiko.

Sra. Mc William tin un trayektoria polítiko eksitoso i a manifestá su mes komo un Parlamentario ku un personalidat fuerte i ku konosementu amplio di asuntunan lokal, di Reino i internashonal.

Su lugá den Parlamento lo ser okupá pa sr. dr. Yves Schoop, un profeshonal dinámiko i fleksibel ku lo sigui ehersé e funshon di presidente di Partido MAN.

E lo mustra e mesun dedikashon i habilidatnan sosial ku kual e ta konosí komo médiko di famia pa e pueblo di Kòrsou, partikularmente den e área di Banda Ariba.

Tur dos polítiko a ekspresá nan disponibilidat pa riba petishon di Partido MAN nan ser sirbidónan na interes di nan pais. Tantu den e enkargo komo Minister i esun di Parlamentario, tur dos kandidato ta karakterisá nan mes ku un aktitut habrí i fleksibel. Esaki ta un muestra di un espíritu di koperashon i síviko na sirbishi di nos komunidat, pa yuda nos Pais Kòrsou positivamente pa e sali for di e krísis ekonómiko aktual i konstruí un sosiedat hustu i sostenibel.

Partido MAN ta gradisí pueblo di Kòrsou pa a kombibí ku e indulgensia nesesario en espera di e momento desisivo aki.

Na nòmber di direktiva di partido MAN

Presidente di partido MAN