Prome Minister Evelyn Wever-Croes: Gobierno di Aruba a reuni cu profesionalnan den cuido Premier Evelyn Wever-Croes: YUDA NOS BUSCA UN SOLUCION PASOBRA NOS NO KIER CONTINUA E RECORTE DI 5 MIYON DEN CUIDO SIN MAS

Prome Minister Evelyn Wever-Croes:

 

Gobierno di Aruba a reuni cu profesionalnan den cuido

Premier Evelyn Wever-Croes:

YUDA NOS BUSCA UN SOLUCION PASOBRA NOS NO KIER CONTINUA E RECORTE DI 5 MIYON DEN CUIDO SIN MAS

Minister Dangui Oduber y Premier Evelyn Wever-Croes a reuni cu e comision nacional di salubridad, riba e topico di recorte di gastonan di cuido di 5 miyon florin pa luna. Premier Evelyn Wever-Croes a indica cu e recorte tabata un condicion di Hulanda pa Aruba por a haya e fiansa di juni 2020, den cuadro di fiansa pa likides.

Den su introduccion Premier Wever-Croes a elabora con duro e situacion tabata na mei 2020, ora Aruba a acepta e condicion di recorte di 5 miyon, y cu no tabata tin ningun ningun otro opcion. E 5 miyon a wordo proponi pa CAFT, y despues Hulanda a converti e condicion den un condicion di 5 miyon pa luna, cu ta 60 miyon pa aña.

Gobierno di Aruba ta haciendo su maximo esfuerso pa elimina e condicion aki for di mesa, y bin cu otro alternativanan mas hustifica na su luga. Te cu dialuna ultimo ainda, Premier a pone esaki riba agenda cu Hulanda, pero Secretario di Estado Knops no kier a acepta esaki y a pidi Premier Wever-Croes pa sigui cu e recorte.

Mientras tanto Minister di Salubridad e aña aki, cu consulta cu Gobierno, a reduci e presion di 5 miyon pa 2 miyon florin pa luna, pendiente otro decisionnan structural cu por reduci e gastonan di cuido.

Premier Wever-Croes a indica cu e ta contento cu Minister di Salubridad a invita tur representante di cuido pa yuda nos pensa riba un solucion, y a gradici tur e representantenan pa acepta e invitacion.

Premier a gradici profesionalnan den cuido pa e trabou grandi cu nan a haci durante e pandemia, bou circumstancianan hopi dificil, y a pidi nan cooperacion pa hunto yega na proposicionnan con por mehora cuido di salud y mes momento yega na recorte.

Den e encuentro, Minister di Salubridad tambe a hiba palabra enfatisando e aprecio y respet cu Gobierno tin pa tur dunado di cuido.

Director di Finansa a duna un presentacion di e situacion financiero actual di nos pais, cu ta hopi hopi malo. Su presentacion “Den e wowo di horcan” ta mustra cu e aña aki y otro aña lo ta economicamente hopi dificil.

Director Interino di AZV a duna un presentacion di e situacion di AZV y con dependiente AZV ta di contribucion di Gobierno. Entradanan di AZV a cay hopi, debi cu menos hende ta pagando menos prima di AZV. Pues contribucion di Gobierno ta e unico alternativa.

Presidente di e comision nacional, Ronny van Trigt, tambe a hiba palabra y a indica cual ta e forma cu e comision lo bay traha.

“Den nomber di Gobierno di Aruba y  di henter e pueblo di Aruba, mi ta desea boso hopi exito y sabiduria, pa yuda nos busca un solucion pasobra nos no kier sigui cu e recorte di 5 miyon florin sin mas. Covid a dal nos duro, mas duro cu cualkier otro pais pasobra nos ta e pais cu mas ta depende di turismo. E unico forma pa nos sali di e crisis aki ta pa acepta e ayudo di Hulanda, cual nos a haci, y awor si nos traha hunto, traha pa Aruba, mi tin tur confiansa cu nos lo ta exitoso”, Premier Evelyn Wever-Croes a duna di conoce.