“Di Tera Nos ta bin y Di Tera nos ta bai” Apertura expo, desvelo di obra Trudy Lampe y estreno Kima Terra 2 

“Di Tera Nos ta bin y Di Tera nos ta bai”

Apertura expo, desvelo di obra Trudy Lampe y estreno Kima Terra 2 

 

Diabierna anochi ultimo tabata special na Museo Arqueologico Nacional Aruba (MANA) den circulo chikito.  Cu musica inspira pa nos antepasadonan toca / interpreta pa Jair Britten a ricibi invitadonan .  Durante e encuentro ameno, Minister encarga cu cultura Xiomara Maduro a dirigi palabra di elogio na Trudy y su dedicacion na arte y artesania. Alavez e mandatario a batisa e hardin precioso unda e programa a cuminsa cu e nomber “Hardin di mi Wela”.

Asina a duna reconocimento na dos gran hende muher. Ta trata di sra. Maria Mercelina Ecury-Leon (matriarca di famia Ecury) y su nieta e gran teatrista y autor Nydia Ecury.  Trudy Lampe a traha e obra “Promesa y Speransa” inspira riba e poesia “Promesa” (N. Ecury, Bos di Sanger, 1976) cu klei di Aruba, grabando textura y marca cu referencia indigina den su obra.  Despues di e declamacion elocuente di Raquel Lampe di “PROMESA” Minister Maduro y Trudy Lampe a desvela e obra cu ta un regalo pa MANA. 

Desde cu MANA a habri su portanan den edificionan di famia Ecury na 2009 a dedica un espacio na arte inspira pa nos herencia cultural. Cu exposicionnan temporario di various artista local a hasi e relacion di Aruba su historia y arte visibel pa bishitantenan. E antepasadonan di Aruba tabata y ainda ta un fuente di inspiracion pa artistanan local y esaki ta conta sigur pa ceramista Trudy Lampe. 

A parti e invitadonan den dos grupo despues di e desvelo teniendo na cuenta reglamento di DVG relaciona cu Covid-19. Un grupo a mira e expo di Trudy den sala di exposicion permanente. Mientrastanto e otro a presencia e estreno di e produccion audiovisual di e artista Ken Wolff “Kima Terra 2”. E produccion indica ta un documentario di Trudy Lampe su amor profundo pa arte di ceramica traha cu klei di Aruba y su conexion spiritual cu e tera di Aruba.  Ken Wolff, yiu homber di Trudy, a logra transmiti e harmonia entre e ceramista y su Aruba dushi tera cu imagennan unico di nos mondi y cunucu. 

E exposicion “Di Tera Nos ta bin y Di Tera nos ta bay y e produccion audiovisual “KimaTerra 2” a ser realisa danki na sosten di Banco Central Aruba y UNOCA. MANA ta contento y orguyoso di por ofrece publico e facinante exposicion temporario aki. Publico por bishita su salanan di exposicion di dialuna pa diabierna di 9.30’or di mainta pa 4.30’or di merdia. Tur bishitante mester sigui reglamentonan di DVG ora di bishita e espacionan publico di MANA. Sigui nos riba facebook Museo Arqueologico Nacional Aruba y National Archaeological Museum Aruba pa mas informacion.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: