MFK ta kontra abusu laboral Trahadó ta warda vários siman pa por haña sita na SOAW

 

MFK ta kontra abusu laboral

Trahadó ta warda vários siman pa por haña sita na SOAW

 

Mr. Drs. Javier Silvania, kandidato # 4 riba lista di MFK kier pone na atenshon di Minister di SOAW sr. Hensley Koeiman diferente kaso di abusunan laboral. 

 

Señor Silvania kier rekordá pueblo di Kòrsou ku lei laboral ta protehá e trahadó. Un trahadó malu tin derecho di pago di su salario. Un trahadó ku traha 5 òf  6 dia pa siman tin derechi di 15 dia di vakashon pa aña. Bou di ningun sirkunstansia e trahadó por pèrdè su dianan liber.

 

Mester drecha kalidat di servisio na SOAW

Ora un trahadó tin problema ku su doño di trabou e por bati na porta di SOAW pa yudansa. E trahadó mester kana un kaminda di krus na SOAW pa e por haña yudansa. Por ehèmpel e trahadó mester warda vários siman pa e por haña un sita na SOAW. No semper e trahadó ta haña informashon korekto tokante su derechinan na SOAW. Suskrito ta urgi minister Koeiman pa hasi algu na e situashon aki.

 

Proyekto di lei

Ta p’esei frakshon di MFK bou di guia di su lider Gilmar “Pik” Pisas a entregá dia 31 di yanüari un proyekto di lei pa introdusí un korte laboral. Un trahadó mes por skirbi su karta na Papiamentu, Spañó, Ingles òf Hulandes i entregá na korte i e trahadó no mester di abogado. Ta solamente Naf. 50 e trahadó ta paga na korte pa atendé e kaso, dentro di 5 siman hues mester atendé e kaso. E doño di trabou ta obligá pa bini korte i duna kuenta i rason na hues. E idea di korte laboral – e asina yama kantongerecht – no ta nada nobo, na Hulanda ya e modalidat aki ta wòrdu uza 

 

Mediadó profeshonal

Den kaso nesesario hues por apuntá un mediadó. E mediadó ta invitá e dos partidonan pa bin sinta na mesa. E trahadó i su doño di trabou huntu ta buska un solushon duradero pa e konflikto laboral bou di guia di e mediadó, mediashon ta trese e partidonan mas serka di otro. E mediadó ta siña e partidonan pa laga pasado un banda, tur dos partido mester gana e konfiansa pèrdí bèk. Bou di guia di e mediadó profeshonal e trahadó ta papia di su doló i frustrashon, e meta di mediashon ta pa drecha e relashon laboral pa asina trahadó i su doño di trabou por traha ku otro den futuro sin mas problema. 

 

Frakshon di MFK ta konvensí ku e proyekto di lei aki lo haña sosten masal di pueblo. MFK no ta hasi promesa bashí durante kampaña polítiko. Ku e proyekto di lei aki MFK kier trese un solushon real i duradero pa e problemanan laboral.

 

Mr. Drs. Javier Silvania

Kandidato # 4 Lista di MFK

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: