Kámara ku ta rekonosé plachi number ta un must TA GOBIERNU SU RESPONSABILIDAT PA YUDA PREVENI LADRONISIA DI OUTO

 

Kámara ku ta rekonosé plachi number ta un must

TA GOBIERNU SU RESPONSABILIDAT PA YUDA PREVENI LADRONISIA DI OUTO

WILLEMSTAD – Un di e dolónan ku dia tras di dia nos pueblo a bin ta sufri i bira víktima di dje ta e fenómeno di Ladronisia di outo. E asuntu aki ta birando un problema serio.

Ta saliendo na kla den e último 5 añanan tras di lomba, un total di 1.380 outo ku a keda hòrta i mayoria di e vehíkulonan aki ta esnan mas ekonómiko, pues esnan ku mas nos pueblo ta kumpra. E daño total okashoná den e último 5 añanan ku a pasa ta na un balor di  35 mion florin.

Banda di  tur esakinan, tin un gran kantidat di suidadano ku a bira víktima, hinkando nan den  un problema sumamente  grave, mirando ku nan ku a pèrdè nan kos di kareda, si mester sigui paga banko e fiansa riba e vehíkulo.

Gobièrnu di Kòrsou den e asuntu aki tin un responsabilidat i esei ta pèrkurá pa tin mihó kòntròl, sigur mediante di teknologianan moderno ku ta eksistí pa yuda hiba un bon kòntròl.

Aki ta bini e kámaranan ku ta rekonosé plachi di number di outo, pero tambe e shofùr ku ta manehá esaki. Den paisnan grandi manera Oustralia, vários pais na Europa i tambe Estádos Unídos, kaminda e fenómeno di ladronisia di outo ta un problema serio, mas i mas a bin ta hasi uso di  e teknologia aki.

Si nos ta kòrda den pasado resien, eks Minister di Hustisia Mr. Nelson Navarro lo mester a manda kumpra algun di e kámaranan aki. Lo ta bon pa Minister aktual di Hustisia Mr. Quincy Girigorie splika kolektividat unda e kámaranan aki ta i pa kiko nan no ta riba kaya ainda.

E sistema aki ta funshoná di tal forma ku na momentu ku tin un plachi number registrá komo hòrta o na momentu ku notifiká esaki, e sistema mes ta rekonosé esaki i ta manda un alterá kaminda nan ta monitoria esaki. Na e mes un momentu e ta identifiká e persona tras di stür mediante rekonosementu di kara. Di e forma aki lo por bai na hiba un mihó kòntròl.

Un otro aspekto tambe ku mester kordiná muchu mas mihó ta e komunikashon entre CRS, Polis, kompanianan di seguro, Belasting di Outo i Keuringslokaal ku mester por sa kon un vehíkulo ku sea a keda importá di dal o a  aksidentá aki na Kòrsou mes, a haña su piesanan pa por a keda drechá.

Sin lugá na duda, Gobièrnu di Kòrsou tin un ròl den hinter e fenómeno aki, pasombra na final e palabra mágiko ta kòntròl. I e kòntròl aki mester kuminsá for di e kámaranan inteligente te ku mas mihó kolaborashon i koperashon entre CRS, Polis, Kompanianan di Seguro, Ontvanger i OW kaminda ta Kùr Outo. Nos por basta nos ke pa evitá ku den futuro mas hende lo bira víktima ku deskonosí nan ta hòrta nan outo.

Si nos ta papia ku Kòrsou mester bira un “smart nation”, anto aki ta un dje kamindanan ku mester kuminsá invertí. Ku Kòrsou di nos Tur den Gobièrnu, nos lo pèrkurá sigur pa bai den e direkshon aki i baha e kantidat di ladronisia di outo.

 

Atentamente

 

Giovanni Atalita

Nr. 6 Kòrsou di Nos Tur

This site uses Akismet to reduce spam. Learn how your comment data is processed.

%d bloggers like this: