Jeanette Bonet #2 riba lista Partido Democraat Ban duna sosten na mamanan soltero pa un Kòrsou ku mas adelanto

 

Jeanette Bonet #2 riba lista Partido Democraat

Ban duna sosten na mamanan soltero pa un Kòrsou ku mas adelanto

 

WILLEMSTAD – Trese un yu na mundu ta e felisidat di mas grandi ku un hende muhé por tin. E realidat di nos dushi Kòrsou ta ku hopi hende muhé ta mama soltero. Bida ta mustra ku lantamentu di un yu no ta algu fásil den pareha i muchu ménos pa e mama soltero. E mamanan ei mester di sosten pa nan por sali dilanti i Jeanette Bonet ta ofresé e sosten ei na nos mamanan soltero. 

Den su funshonnan den maneho di hotèl i Asosiashon di Komersio i Industria Jeanette Bonet a mira djaserka e difikultatnan ku mamanan soltero ta pasa, sigur na momentu ku nan mester kombiná e trabou tan nesesario, ku kuido di nan yu i sigui eduká nan mes pa un mihó futuro pa nan mes i nan yunan.

Komo dirigente e por komprondé kiko ta nifiká kada bia ora ku un mama no por sòru pa su yunan. E mama ei tin difikultat pa konsentrá den su trabou tambe. Ta importante pa e mama soltero tin akseso na sosten den diferente forma. Kisas no ta sosten finansiero ta e nesesidat di mas grandi, kisas ta sosten ku transporte pa e yega trabou òf pa hiba su yunan skol. Den su karera den empresa priva Jeanette Bonet a sirbi komo ehèmpel pa mustra e potensial di hende muhé. El a duna guia i mustra hopi mama soltero kon pa lucha i logra kresementu den nan bida ku finalmente ta pèrkurá pa adelanto pa nan yunan tambe. Jeanette Bonet ta proponé pa ban fleksibilisá lei di labor i hasi posibel pa un mama por traha 20 ora enbes di 40 ora pa siman. Di e forma ei e por dediká tempu balioso na su yunan i na mes momentu e empresario por tuma un hende mas na trabou.

 

Jeanette Bonet komo muhé pará firme den su sapatu ta presentá algun proposishonnan konkreto. Entre otro un redukshon di belasting pa e muhé ku tin yu òf a adoptá un yu ménos di 3 aña. Pues un redukshon di impuesto pa e mama soltero. E úniko kondishon ta ku e dama aki mester tin trabou. Otro proposishon konkreto ta un asina yamá ‘kinderbijslag’. E mama soltero sigur por hasi bon uso di sosten den forma di alimento na skol/opvang i tambe karchi di transporte. Pa e mama soltero sin trabou e #2 riba lista di Partido Democraat ta bai traha pa bini ku sosten ekonómiko kombiná ku gastunan di rekapasitashon pa por drenta merkado laboral bèk. Tambe un seguro di bida ku por yuda pa kubri un posibel hipotek òf pa sigurá futuro di su yunan. 

 

Jeanette Bonet ta #2 riba lista di Partido Democraat, un muhé ku pashon pa hende. Su determinashon profeshonal kombiná ku dedikashon na su yunan a pone ku kompanianan unda el a traha a konfia den dje. ‘Na tur hende muhé: Ser mama soltero no ta un krímen, ta algu ku por pasa ku tur muhé. Hisa kabes, traha duru i ku un aktitut positivo pa sigui krese. Partido Democraat ku su ideologia liberal ta duna rèspèt na tur hende i ta traha pa kambionan fundamental kreando kuponan di trabou i elevá nos hendenan den enseñansa pa Kòrsou por prosperá. P’esei ta importante pa fortifiká ekonomia pa asina por kubri e nesesidat serka mamanan soltero.”

 

Jeanette Bonet ta bai traha pa e mamanan soltero, pasobra niun hende no ta keda atras!

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: