Partido Democraat ku un ekuentro ku Verenigings Bedrijfsleven Curaçao (VBC)

 

Partido Democraat ku un ekuentro ku Verenigings Bedrijfsleven Curaçao (VBC)

 

Partido Democraat ta para pa diálogo i kolaborashon estrecho ku partnernan sosial, sektor empresarial i sindikal. 

Den komienso di siman Partido Democraat a reuní ku “Vereniging Bedrijfsleven Curaçao” kaminda ámbos partido por sera konosí ku otro.
E delegashon di VBC tabata konsistí di sr. Daniel Hodge, Boy Magdalena, Bas Kooyman i Jack Mirpuri, miéntras esun di Partido Democraat tabata konsistí di lider di partido sra. Elsa Rozendal, sra. Jeanette Bonet (2)  sr. Tercy Ignatia (3) i sr. Haitham Metry (6).

 

VBC ta un organisashon ku ta representá e mundu di industria i komèrsio na Kòrsou i un di su metanan prinsipal ta pa protehá interesnan di empresarionan ku ta miembro di VBC pa asina nan por ehersé nan ròl den nos komunidat mas mihó posibel.

Durante e kombersashon tabatin interkambio di entre otro e pensamentu i ideanan ku VBC tin riba desaroyo ekonómiko. Un di e puntonan kardinal durante e enkuentro ta e echo ku gobièrnu tin hopi aña ta bisa ku ta bai eliminá e “red tape” den e aparato gubernamental, pero nada no ta wòrdu hasí. Vários biaha ta sosodé ku invershonistanan internashonal ke bin invertí i hasi negoshi na Kòrsou, pero nan ta haña nan konfrontá ku e tempu muchu largu ku nan tin ku warda pa keda kla ku otro pèrmit i otro rekisitonan. Mayoria di nan ta buska otro pais den region pa establesé nan mes òf nan empresa. Tin vários ehèmpel pa ku esaki den e último añanan.

Partido Democraat meskos ku el a hasi esaki na añanan ’70 i ’80, ta di akuerdo ku mester kuminsá hasi e aparato gubernamental mas efisiente pa kosnan realmente sosodé! Gobièrnu mester kuminsá fasilitá tur persona ku ke duna su aporte na kresementu i desaroyo di nos ekonomia. Asina e por keda kla den un tempu pre-definí ku su petishonnan di pèrmit. Ta netamente esaki ta un di e puntonan prinsipal ku tin den Partido Democraat di programa Agenda21; esta implementá mas pronto ku ta posibel e sistema ku yama E-Government kaminda mayoria kos por bai via un sistema digital.

Partido Democraat ta para pa ménos metementu di Gobièrnu i laga kosnan ku sektor privá por hasi mihó, hasi esaki.