Spich Pacheco Domacassé: Dia di Viktoria

Dia  di  Viktoria

 

Den kurso di Siglo 18 i diferente siglo promé, pueblonan di Oropa Oksidental tabata biba den gara di un pobresa ekstremo inimaginabel, miéntras ku un grupito di Noblesa tabata doño di práktikamente tur loke tabata eksistí. Por bisa ku nan tabata doño di asta forsa di labor di henter un pueblo. Konsekuentemente nan tabata posee un poder totalitario ku nan tabata ehersé sin piedat riba e masa ku tabata eksistí den un estado di miseria difísil di deskribí. Tabata opvio ku e situashon aki dado momentu lo a kondusí na un eksploshon sosial sin presedente. Y esaki ta tuma lugá tambe dia 14 di yüli 1789 ora pueblo Fransés lanta na Paris i kima gran parti di nan siudat, gritando e grito di kampaña: Libertat, igualdat i fraternidat. Echo inegabel ta ku despues di kada akontesimentu rebolushonaria di taye, ta surgi un bashí di poder ku na okashon ta kondusí na un situashon di kaos polítiko kompletu, miéntras ku sierto grupo ideológiko òf indivíduo ta hasi uso di e kaos aki pa kue poder. Y hustamente esaki ta loke ta pasa na Fransia den último kwartal di Siglo 18, ora un militar di alto rango -un narsista psikópatiko ku un ansha pa poder insasiabel yamá Napoleón Bonaparte- ta kue poder na Fransia. Napoleón ta kuminsá di inmediato ku un racha di konkista i den korto tempu e tin henter kosta di Oropa Oksidental bou di su poder. 

 

Dominio di Napoleón riba kosta firme di Oropa awor, ta hinka komersio Inglés den un situashon sumamente prekario. Enbuska di merkadonan nobo, Kòrsou ta resultá un base komersial-militar ideal pa Inglesnan den Karibe. Pues, den kustía di Sur-Amérika i Amérika Sentral (Sur). Konsekuentemente nan ta kuminsá un seri di atake kontra nos Isla durante 3 aña largu. E promé atake ta tuma lugá riba 31 di yanüari 1804 i ta dura práktikamente 4 siman largu. Kompletamente inesperá sin embargo, Inglesnan ta haña nan mes konfrontá ku resistensia fuerte di un Pueblo desidido i Kòrsou ta logra un viktoria aplastante kontra e potensia militar mas poderoso di e tempu ei; pa ta mas eksakto riba 26 di febrüari 1804. Den kuadro di konmemorashon di 217 aña di e akontesimentu históriko aki, Fundashon General Manuel Carel Piar kier brinda Komunidat di Kòrsou e siguiente deskripshon sumario di e hazaña glorioso aki. 

 

Tabata mardugá di 31 di yanüari 1804, ora un eskuadron naval ingles impresho-nante ku no ménos ku 1500 sòldá entrená ta desembarká na Piskaderabai i eksihí entrega direkto di nos Isla. Kòrsou ta nenga redondamente i Colon ta kima. Di diferente ángulo Inglesnan ta kuminsá bombardiá Punda i Otrobanda, sakeá i kima sin miserikòrdia den nan marcha pa kurason di nos Pais. Kòrsou ta mobilisá den un akshon relámpago ku e asina yamá ‘Milisia Defensa Popular’ di e tempu ei komo punta di lansa. Na kabes Luis Brion i den su kustía i man drechi Manuel Carel Piar, dos guerero yu di tera legítimo ku tabata destiná pa desempeñá un papel krusial den liberashon di kontinente Sur-Amerikano. Tur dos na e momentu ei ya a konosé bataya militar kampal: Brion den pleno guera na Oropa na banda di kompatriotanan rebolushonario Hulandés i Piar komo partísipe den e di dos lantamentu di Pueblo Benesolano kontra opreshon Spañó na La Guaira 1797, enkabesá pa Manuel Gual,  José Maria España i Juan Bautista Picornell. E promé tabata komandá pa e sambo Chirinos na mei 1975. 

 

Nos forsanan ta hiba un defensa tenás na komienso di Roodeweg, apoyá den lomba pa un Pueblo kompletu. Informashonnan di fuente ofisial ta konta ku logístika di e akshon militar aki tabata práktikamente den man di hendenan di koló liber i esklabonan ku tabata transportá awa, kuminda, herido, morto i pieda, hasiendo uso di buriku, kabai, garoshi i riba lomba, miéntras ku otronan ku solamente nan forsa di brasa, chikoti, chapi i arma blanku tabata tuma parti direkto na e lucha. Despues ku na ámbos banda ta kaí gran kantidat di morto i herido, nos ante-pasadonan ta logra forsa un atake frontal. Sorprendé pa e aktitut heróiko di nos Pueblo, Inglesnan despues di mas ku tres siman di lucha ta bati retirada den un akshon di desesperashon. Piar, guerero di naturalesa, ta logra kòrta kaminda di un grupo i ta eliminá nan na Dein i Groot Kwartier. Hubileo di un Pueblo den su totalidat ta yena shelu di Kòrsou, gradisiendo Todopoderoso pa su grandesa infínito! Un pueblo di apénas 30.000 alma a pone un potensia militar mundial na rudia i ta deklará 26 di febrüari 1804 komo ‘Dia di Viktoria’; un dia ku durante diferente aña a keda selebrá komo tal. Inglesnan, rekonosiendo nan derota i tambe determinashon heróiko di pueblo di Kòrsou, ta aportá verbalmente na e gran viktoria aki denominando Kòrsou komo “The Indomitable Island”, Isla Indomabel òf Isla Invensibel! Sigun dokumentu-nan ofisial, Brion i Piar ta haña tur klase di rekonosementu pa nan aktuashon heróiko, miéntras ku e Enkargado di Gobièrnu Hulandés na Kòrsou ta informá Hulanda di e kondukta ehèmplar di Kurasoleñonan, ku énfasis riba balentia di e Afro-Kurasoleño ku práktikamente a hiba gran parti di e lucha, guiá pa nan lidernan Luis Phillipus Brion i Manuel Carel Piar, yunan di tera propio i futuro prósernan di un kontinente nobo: Nós Kontinente.

                                                                                                                   

                                                                              Pacheco Domacassé

                                                            Presidente Fundashon General Manuel Piar

This site uses Akismet to reduce spam. Learn how your comment data is processed.

error: Content is protected !!
%d bloggers like this: