*SITUASHON AKTUAL DI ENSEÑANSA: “NOS TABATA BLUDU KABA;12,5% DI REKORTE TA FATAL!”*

Sindikato DOEN riba djaluna 1 di mart 2021 durante di un konferensha di prensa huntu ku su direktiva i shopstewardnan a duna un splikashon amplio di e situashon den enseñansa, motibu pa kua e 12,5% ku a kòrta den kondishonnan laboral di e.o. trahadónan den enseñansa ta un sla mortal!

*Situashon Aktual*

Pa mas ku 15 aña enseñansa no a konosé ningun klase di invershon struktural. Kòrta si a kòrta den presupuesto di enseñansa. Pa mas ku 15 aña no a kumpli i te asta ta violando lei di posishon hurídiko di trahadónan den enseñansa. Tur tempu trahadó den enseñansa a hasi e sakrifisionan nesesario mandando na hopi okashon mannan saku pa kumpra material pa skol, dekorá i/o fèrf klas. Pues ehèmpel di solidaridat aña aden aña afó!

Awe ku Covid a oumentá drástikamente e preshon laboral tampoko nos por konta ku invershon. I komo chèri riba e bolo ke kòrta 12,5% tambe for di nos kondishonnan laboral i spera ku maestronan i personal di apoyo ta keda motivá i duna tur ku tin! HABUZU!

Ku un promedio di mas ku 100 ora èkstra ku trahadónan den enseñansa ya a invertí den ehekushon di protokòlnan di Covid pa brinda enseñansa durante e pandemia akí ta insólito ku ke pa nos traha èkstra, sin ku ta paga nos esaki i pakolmo riba dianan liber. E famoso entrega di 36 ora! Wèl,wèl!

E situashon akí ta poniendo ku no solamente koleganan ta fadá, kansá i demotivá sino tambe hopi ta pikiendo nan bulchi pa bai! “Nos enseñansa ta na peliger pues futuro di nos pais tambe!”

*Nos Posishon*

Konsiderando e situashon akí no ta ke nos no ke, pero simplemente nos no por karga ku e medida funesto akí. E medida di 12,5% akí ta un sla fulminante! “Pues nos NO POR karg’é!”

“Na tur kolega den enseñansa keda pendiente pa e “follow up” palabrá!”

*Direktiva di Sindikato DOEN*

1 di mart 2021