Haitham Metry, #  Partido Democraat Leinan adekuá i polis di medio ambiente awor!

 

Haitham Metry, #  Partido Democraat

Leinan adekuá i polis di medio ambiente awor!

 

WILLEMSTAD – Den e tempunan aki ménos hende ta biaha bai pafó di Kòrsou, ku konsekuensia ku awor mas tantu hende ta keiru i disfrutá di e bunitesa úniko di nos isla. Pero ta un tristesa di mira kuantu sushi tin bentá tur kaminda. Boluntarionan ta limpia un área i djis despues otronan sin eskrúpulo ta yega trankil i aparentemente sin ku nan kurason ni nan konsenshi remordé, i nan ta bolbe basha nan porkeria tur kaminda. 

Partido Democraat a mira ku durante di último añanan gobièrnunan di turno no a hasi nada, pero nèt nèt nada konkreto pa ataká dumpmentu ilegal di sushi. Haitham Metry ta bisa ku polítikonan ta bati boka i bisa yen di kos, pero niun den pasado no a hasi nada. Parlamentarionan durante di hopi aña a papia bunita òf otronan ta kritiká tur kos, sin ku niun a move ni un dede pa trese kambio di lei pa atendé ku dumpmentu ilegal di sushi. 

Ku Partido Democraat den Parlamento pueblo por konta ku sigur lo bini leinan nobo i efektivo kontra dumpmentu ilegal di sushi i polushon di medio ambiente. Democraat ta pone kos pasa! E tempu di bla bla bla a pasa, asina Haitham Metry ta enfatisá.

Un kampaña di konsientisashon semper ta bon i mester sigui kuné, pero a bira tempu ku mester duna nos outoridatnan e hèrmèntnan nesesario pa nan por aktua. Ta inaseptabel ku outoridatnan ta topa hende ta basha sushi i no tin muchu kos ku nan por hasi kontra di un hende asina. E kosnan aki ta inaseptabel. Hendenan ta burla di nos outoridatnan i den otro kaso asta ta menasá esnan ku avisá outoridatnan di nan aktonan ilegal. E kosnan aki no por sigui!

Pa desishon robes di pasado awendia no tin SKS ni polis di medio ambiente anto pa kolmo parlamentarionan no a adaptá ni sikiera e leinan nesesario di manera ku polis por aktua. 

Ban pone kos kana, ban hasi kosnan konkreto. Haitham Metry ta pidi bo sosten, abo ku ke mira nos dushi Korsou limpi i dushi atrobe. Dia 19 di mart awor, bo sa kaba, vota Partido Democraat i ban aktua kontra tur shushou ku ta daña nos ambiente. 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: