Minister Jesus-Leito ta duna oido na preokupashon di trahadónan di Kadaster i Domeinbeheer

Minister Jesus-Leito ta duna oido na preokupashon di trahadónan di Kadaster i Domeinbeheer
 
Willemstad – Riba djamars 2 di mart, Minister Jesus-Leito a reuní huntu ku ABVO i gruponan di servisio di Domeinbeheer i Stichting Kadaster. Meta di e reunion aki tabata prinsipalmente pa trahadónan por a ekspresá nan puntonan di preokupashon. Esakinan tabata enserá entre otro insertidumbre rondó di desaroyonan di e “Grond en Vastgoedbedrijf”, i pa loke ta entre otro kambio di statuto di Stichting Kadaster i Grond- en Vastgoedbedrijf su posibel ròl den esaki tambe.
 
Por indiká ku e reunion a kana di forma trankil i tur presente por a duna splikashon amplio, ekspresá nan preokupashon, i yega na otro. Tabata tin diferente punto di atenshon bálido ku a atendé. A ​palabrá ku lo komuniká ku otro riba un base mas struktural.
 
Pa loke ta e puntonan di preokupashon mas grandi, por indiká ku trahadónan di tantu Domeinbeheer komo Stichting Kadaster por ta trankil. Nan pan di kada dia no ta na peliger pa loke ta trata desaroyonan di Grond- en Vastgoedbedrijf. E empleadonan di Domeinbeheer lo hasi un transishon pa bai den e organisashon nobo, ku lo keda un entidat den e aparato públiko mes. Tambe a bini e sugerensha dilanti pa informá i komuniká muchu mas tantu tokante e meta i tambe struktura di e Grond- en Vastgoedbedrijf. Minister Jesus-Leito a bai di akuerdo ku e sugerensha aki i despues di desishon di Konseho di Minister, lo kuminsá ku un kampaña di informashon pa duna informashon korekto rondó di e Grond- en Vastgoedbedrijf.  
 
Pa loke ta Kadaster, lo sigui kana e proseso di kambio di statutonan, i lo warda riba e desishon di korte pa loke ta e aspekto finansiero di e organisashon.
 
Meta di tur esakinan ta en general pa tur dos organisashon krese yega na un nivel aun mas haltu, pa asina por brinda mihó servisio na nos komunidat. 

This site uses Akismet to reduce spam. Learn how your comment data is processed.

error: Content is protected !!
%d bloggers like this: