Premier Evelyn Wever-Croes:  IMF A PUBLICA SU RAPPORT RIBA E EVALUACION FINANCIERO Y ECONOMICO DI ARUBA IMF: Aruba su economia tabata ya caba bayendo den bon direccion prome cu e pandemia a dal

 

Premier Evelyn Wever-Croes: 

 

IMF A PUBLICA SU RAPPORT RIBA E EVALUACION FINANCIERO Y ECONOMICO DI ARUBA

IMF: Aruba su economia tabata ya caba bayendo den bon direccion prome cu e pandemia a dal

 

Dialuna mainta den Conferencia di Prensa di Gobierno di Aruba, Prome Minister Evelyn Wever-Croes y Minister di Finansa, Xiomara Maduro conhuntamente a elabora riba e conclusionnan di e rapport di IMF riba e evaluacion financiero y economico di Aruba. Esaki a wordo publica dialuna mainta. Prome Minister a expresa su alegria bisando cu e dia aki ta yen’e di orguyo despues di a caba e rapport di IMF despues di a haci e analisis di mission di articulo 4. 

 

Desde cu Gabinete Wever-Croes ta na mando, ta haña resumennan relativamente positivo for di IMF. E biaha aki, segun Prome Minister, Gobierno tawata tin preocupacionnan pa motibo cu e pandemia a dal nos duro. IMF a publica e declaracion final di un trabou cu nan a haci e ultimo 3 simannan riba Aruba den cua IMF ta conclui cu Gobierno di Aruba a logra contene e efectonan di Covid mas tanto cu ta posibel danki na un reaccion lihe cu a yuda pa contene e daño cu e pandemia a ocasiona. 

 

IMF ta cuminsa cu bisa tambe cu Aruba su economia tabata ya caba bayendo den bon direccion prome cu e pandemia a dal. Nan ta indica cu Aruba tabata recuperando e economia especialmente door di turismo, ta indica cu tabata tin plannan ambisioso, fiscal financiero y tambe pa diversifica nos economia. 

 

IMF ta constata tambe cu pa 2019 nos a yega tambe nos target financiero hasta cu un margen mas comfortable. IMF ta mira tambe con e efecto di Covid tabata riba nos ecconomia cu a causa e recesion mas pisa cu nos a conoce pero ta bisa tambe cu Gobierno a actua rapidamente cu e paketenan di alivio y di subsidio cu a wordo duna cu ta FASE, subsidio di salario, asistencia financiero na empresanan mediano y chikito y e sosten finaciero cu ta wordo duna na e fondonan di AZV y SVB no a kibra. 

 

IMF ta indica tambe cu esaki a yuda pa contene e daño y efectonan cu e pandemia por a haci riba empresanan cu por a bay bancarota na unda mas hende lo a perde trabou y pa scapa bida di hende. 

 

“Bisando esaki, mi ta sumamente contento cu IMF ta reconoce e esfuersonan grandi cu Gobierno di Aruba ta bin ta haciendo y IMF ta yega na e conclusion y bisa tambe cu e riesgonan bayendo padilanto ta exceptionalmente halto. IMF ta considera cu e pasonan y decisionnan cu nos mester bay tuma awor mester ta pasonan bon pensa pasobra nan ta bay ta hopi crucial. Ami ta bay interpreta esaki cu nan mester ta pasonan hopi responsabel y cu ta exigi hopi prudencia. Pero nos tin hopi confiansa mirando con nos a goberna e pais aki e ultimo añanan aki especialmente den aña di pandemia y nos lo logra esaki tambe. 

 

Mi kier gradici minister di Finansas Xiomara Maduro pa su trabou incansabel pasobra esaki ta muestra di trabou duro di dia y anochi. Sinembargo cu e ekipo cu ta sostene Minister di Finansa, a logra pasa e mision di articulo 4. Tambe mi ta gradici tur colega Minister y tur departamento y instancianan cu a participa na e mission aki. Pero un danki grandi tambe na henter comunidad pa tur cooperacion y sosten”, Prome Minister Evelyn Wever-Croes a termina bisando. 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: