Partido Democraat ta interkambiá pensamentunan ku DMO riba situashon den nos Sentro di Siudat.

Partido Democraat ta interkambiá pensamentunan ku DMO riba situashon den nos Sentro di Siudat.

 

Durante un bishita ku lider polítiko di Partido Democraat Elsa Rozendal huntu ku sra. Jeanette Bonet (#2) i Isaura Maxwell (#4) a hasi na DMO a bin vários punto di atenshon dilanti.
Downtown Management Organization (DMO) ta e organisashon ku ta representá komersiantenan den Punda.

Pa hopi tempu kaba ta eksistí un malkontentu enorme pa loke ta trata stashonamentu di vehíkulonan den sentro di siudat. Awor ku e kontrakt ku e kompania PAC a finalisá ta nèt un bon momentu pa gobièrnu tuma e desishon pa trese e kambionan nesesario pa asina Kòrsou por bai den direkshon di “smart city parking”. DMO ta di opinion ku gobièrnu mester krea un sistema di “Public Private Partnership” kaminda e distritonan Punda, Otrobanda, Skalo i Pietermaai ta partisipá den un entidat ku ta brinda un servisio agradabel na tur usuario kaminda e fondonan ku e servisio aki generá ta bai bèk entre otro pa hasi mantenshon den sentro di siudat. Esaki ta eksaktamente den mes un liña ku lokual Partido Democraat ta para p’e; ménos enbolbimentu di gobièrnu den aspektonan ku sektor privá por hasi muchu mas mihó i efisiente. Un bon ehèmpel di esaki ta e área di Renaissance Hotel kaminda tin kayanan di gobièrnu pero pa medio di un akuerdo ku e sektor privá e área aki semper ta limpi i bunita.

Ambos partido ta di akuerdo tambe ku mester hasi nos sentro di siudat agradabel atrobe. Hopi aspekto ta hunga un ròl den esaki. Gobièrnu mester duna por ehèmpel e turistanan ku ta kai den e kategoria di “stay-over” tambe un bentaha fiskal (tarifa di tax-free) i no solamente e turistanan krusero. Ku esaki lo bo atraé mas turista den bo sentro di siudat.

Pa loke ta trata bibienda den Punda, esaki ta kanando den bon direkshon. Na e momentunan aki tin alrededor di 40 apartamento pa residensia kòrtiku i tambe tempu mas largu.

Nos hendenan i tambe turistanan mester sinti nan mes mas komprometí ku Punda. Pa esaki a bin diferente proyekto manera esun di “Punda Vibes” ku ta un éksito pa algun aña kaba. Lider di Partido Democraat Elsa Rozendal ta di opinion si ku mester bini mas di e tipo di proyektonan aki pa hasi Punda atraktivo pa e hóbennan tambe.

Punda tin TUR e ingredientenan manera kultura, hóreka, historia, lifestyle pa hasi nos sentro di siudat esun mas atraktivo den nos region.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: