VISHON LO EKSPLORÁ PLAN INOVATIVO PA BIBIENDA SOSIAL TEMPORAL “…laga nos bini huntu huzando inovashon pa yuda nos famianan den nesesidat di un bibienda…”

 

 

VISHON LO EKSPLORÁ PLAN INOVATIVO PA BIBIENDA SOSIAL TEMPORAL

“…laga nos bini huntu huzando inovashon pa yuda nos famianan den nesesidat di un bibienda…”

 

Willemstad, 15 di Mart 2021 – VISHON lo eksplorá un plan inovativo kaminda Gobièrnu di Kòrsou i doñonan di bibienda por bini huntu pa yuda famianan ku ta den nesesidat di un bibienda temporal. Según kandidatonan di partido VISHON, Joûrich Christina i Roy Huggins, esaki ta bira posibel dor di krea un plataforma digital kaminda doñonan di bibiendanan ku ta para bashí por registrá esakinan i pone e bibiendanan aki disponibel na Gobièrnu komo kasnan sosial temporal pa asina yuda famianan ku ta den nesesidat agudo di un bibienda na un preis pagabel.

 

Aktualmente tin mas o menos 900 famia na Kòrsou ku ta den un situashon sosial agudo ku ta rekerí yudansa a korto plaso. Esaki ta debí na e situashon di krisis ekonómiko ku nos ta pasando aden ku trese kune sifranan astronómiko di desempleo den nos pais. Na mes momentu, e mesun krisis ekonómiko aki a afektá e merkado di benta i hür di bibiendanan na un manera sumamente negativo. Prinsipalmente pa e motibu aki i tambe pa otro faktornan, tin un gran kantidat di bibiendanan ku ta para bashí en espera di personanan ku lo por hür of kumpra esakinan.

Sr. Roy Huggins di VISHON ta kere ku fasilmente por trese e dos gruponan aki huntu, ku intervenshon di Gobièrnu, pa asina famianan den nesesidat por risibí un bibienda temporal pa aliviá nan situashon, kreando asina tog un kanal di entrada pa e doño di e bibienda ku normalmente lo a keda para bashi. “E sistema aki ta ampliamente konosi di ta funshona ekstremadamente bon den eksterior, kreando asina benefisio pa tur 3 partido. Gobiernu ta para ofisialmente komo hurdo di e kas, supsidiando asina parti di e gastunan mensual di e kas, e famia ta risibi un bibienda kaminda, pa un periodo máksimo di 2 pa 3 aña, nan ta haña e chens pa para bèk riba nan pia i e doño di kas tambe ta kontentu ku e ta risibiendo un entrada pa su bibienda apesar ku e merkado ta stanká.”, asina Roy Huggins a sigui splika.

“Nos lo krea un plataforma digital outomatisá kaminda doñonan di kas por registrá nan bibienda na un manera masha fásil mes i kaminda nan mes por stipulá e periodo ku nan ta pone nan bibienda disponibel.”, sr. Jourich Christina di VISHON a splika. “Ku e plataforma aki, nos ta stimulá e sentido di responsabilidat i konbibensia sosial i laga komunidat mes ta parti di e solushon pero ku enbolbimentu minimo di Gobièrnu. Gobièrnu su ròl lo ta solamente di stipulá e kriterianan pa un famia yega na remarke pa un di e bibiendanan sosial temporal aki i tambe di krea un trayekto guia ku e famia mester enkaminá pa asina nan por bai para bèk riba nan mes pia.”

Si VISHON risibí pueblo su sosten i logra representashon den Parlamento di Kòrsou, esaki lo ta un di e plannan inovativo i proyektonan di lei ku nan frakshon lo bai presentá komo parti di nan agenda sosial.