Pronto, gran parti di e depósitonan serka Girobank N.V. lo ta disponibel
Pronto, gran parti di e depósitonan serka Girobank N.V. lo ta disponibel
Willemstad/Philipsburg – Dia 10 di desèmber 2019, a pone un moratorio riba Girobank N.V.
(Girobank), mediante kua a fris e fondonan ku tabata surpasá NAf 10.000 riba e kuentanan koriente i di
spar na Girobank. Pronto, GI-RO Settlement Holding N.V (GSH) lo paga gran parti di e fondonan
kongelá. Di e manera ei, mayoria di e titularnan di kuenta di Girobank lo por disponé libremente di
henter nan depósitonan. Esei lo no konta pa depósitonan ku ta surpasá NAf 1.200.000. Den kaso ku e
depósito ta mas haltu, GSH lo paga te na un máksimo di NAf 1.200.000.
Pa risibí e pagonan ku GSH ta bai hasi, un titular di kuenta por transferí e fondonan pa un kuenta na un
otro banko di su preferensia. Ta rekomendá e doñonan di kuenta ku no tin un kuenta na un otro instituto
bankario ainda pa habri un kuenta mas pronto posibel. Por hasi transferensia via online banking. Debí
na e situashon aktual di Covid-19, e no ta rekomendabel pa bishitá e sukursalnan di Girobank (na Skalo
òf Janwe). Por lanta e fondonan via e mashinnan di ATM tambe, teniendo kuenta ku e montante
máksimo ku por lanta na un ATM. Sin embargo, pa motibu di siguridat, ta deskonsehá fuertemente pa
lanta suma haltu di sèn kèsh.
Pronto e titularnan di kuenta di Girobank lo risibí un notifikashon tokante esaki.
Den kaso ku, banda di un òf mas kuenta ku saldo positivo, un doño di kuenta di Girobank tin debe na
Girobank ku a vense kaba – manera un fiansa òf otro tipo di finansiamentu ku tin pago atrasá riba dje
– GSH lo deskontá e debe ei for di e pago promé. E titular di kuenta por disponé libremente di e suma
ku keda despues ku deskontá e debe.
Si e fiansa òf otro tipo di finansiamentu no tin pago atrasá riba dje, tambe e titular di kuenta por baha
òf kanselá su debe mediante e pago ku e risibí. Por tuma kontakto ku Girobank tokante esei.
E pagonan ku GSH ta bai hasi di e depósitonan serka Girobank te na e montante máksimo di NAf
1.200.000 ta ser prefinansiá ku un fiansa ku interes di 0% na balor di NAf 170.000.000 ku Hulanda lo
hasi Kòrsou. Dia 28 di desèmber 2020, GSH a ser lantá ku e meta di tuma Girobank su portafolio di
fiansa i sigui manehá i kobrá e fiansanan aki. GSH lo usa e entradanan optené di maneho i kobransa di
e portafolio di fiansa pa paga e fiansa di Hulanda bèk. Kòrsou i GSH tin palabrashon hasí al respekto
ku lo keda fihá den un akuerdo.
Ora kaba di paga e fiansa na Hulanda, konforme su deber statutario, GSH lo usa tur demas entrada di
maneho i kobransa di e portafolio na benefisio di e titularnan di kuenta ku saldo riba NAf 1.200.000.
Na su debido tempu lo informá e titularnan di kuenta akí al respekto.
Pa pregunta riba e tema akí, por tuma kontakto ku Girobank via e-mail giro@centralbank.cw òf via telefòn na +5999 4339130.
Willemstad, 17 di mart 2021
CENTRALE BANK VAN CURAÇAO EN SINT MAARTEN & MINISTER DI FINANSA