Kiko tin skondé den e Rijkswet COHO? 

 

Kiko tin skondé den e Rijkswet COHO? 

 

PIN ta sumamente preokupá ku ta tene tantu e konsepto di lei di Reino, ontwerp-Rijkswet COHO, komo e konseho di Raad van State ku ya for di 3 di mart– dos siman pasá- skondí pa pueblo. Esei riba su mes ta un violashon flagrante di e proseso pa trata leinan di Reino ku ta regarda Kòrsou. Ya tin mas ku dos luna ku e partidonan na mando, PAR i MAN, a bin ta hiba un kampaña di intimidashon komo nan punto di lansa prinsipal pa gana voto. Ta bisto ku ambos partido ke pa pueblo kere ku mester pèrmití tres Hulandes apuntá dor di Hulanda bin goberná e pais aki, a kambio di un fiansa pa atendé ku e konsekuenshanan di e krisis di Covid-19. 

 

Konforme e prosedura pa tratamentu di Leinan di Reino i Leinan di Konsenso, despues ku Konseho di Minister di Reino trata un konsepto di lei, e lei ta bai via di e kanalnan indiká pa Raad van State pa konseho. E prosedura preskribí ta, ku e konseho di Raad van State mester forma base pa konsulta tantu na nivel ministerial komo na nivel di amptenar promé ku e konsepto bolbe bai Konseho di Minister di Reino. Ora ta trata temanan ku ta regarda e otro paisnan di Reino (Kòrsou, Aruba i St. Maarten), e konsulta mester tuma luga ku e Kabinete di Minister Plenipotensiario di e paisnan. E Minister Plenipotensiario mester haña instrukshon pa e konsulta di su gobièrnu. Pa por duna instrukshon na e Minister Plenipotensiario, e gobièrnu mester tuma nota di e konseho pa por duna direkshon na su peritonan den su pais pa traha e instrukshon. 

 

Ta praktikamente inkomprendibel kon sr. Rhuggenaath (PAR) i sr. Martina (MAN) ku a firma un protokòl ku sr. Knops riba e konsepto di Lei COHO, dos siman despues ku Raad van State a fiha su posishon riba e konsepto di lei, ainda no a haña e konseho, segun esakinan a deklará durante e Foro Polítiko na TeleCuraçao. Si esei ta e kaso, ta trata di un violashon flagrante i falta di rèspèt brutu di parti di gobièrnu di Reino (lesa Hulanda) pa ku su partnernan. PIN no ke ni pensa ku pa benefishinan polítiko PAR i MAN dos siman despues ku e konseho di Raad van State ta kla, no a mustra transparensha dor di informá pueblo di esei. Pio ainda, sr. Rhuggenaath tur sobresaltá a bisa ku sra. Camelia-Römer ta trese bruashon, ora ku e lider di PIN a konfrontá partidonan ku e hecho aki durante e Foro Polítiko. 

 

Tantu PAR komo MAN mester ta bon konosí ku e violashon di nos outonomia a kambio di yudansa durante e krisis di Covid-19 ta inaseptabel pa e gran mayoria di e pueblo aki. Sigur si tuma nota kon ta propone un kantidat di medida pa hasi pueblo mas pober, manera ta e kaso ku kortamentu di duurtetoeslag (penshun) di mas ku 10,000 eks amptenar. 

 

Pueblo di Kòrsou meresé transparensha i klaridat prome ku djabièrnè awor riba kiko spesífikamente a kumbiní ku Hulanda. Ta futuro di nos yunan i no por ta skondé informashon balioso pa nos hendenan na e krusada ku nos a yega aki.