Minister Xiomara Maduro a ricibi di dos vacuna contra COVID19 Nos mester sigui vacuna pa nos economia por recupera

Minister Xiomara Maduro a ricibi di dos vacuna contra COVID19

Nos mester sigui vacuna pa nos economia por recupera

ORANJESTAD – Algun siman atras, Minister Sra. Xiomara Maduro, a tuma e decision pa vacuna contra COVID-19 pa duna ehempel na comunidad cu nos mester vacuna pa proteha nos mes, nos famia y tur esnan cu nos ta den contacto cune. E vacuna ta necesario pa asina nos por baha contagio y pa turismo por bolbe florece pa asina nos por recupera e economia di nos Pais.

Siman pasa a toca turno pa Minister Maduro haya su di dos dosis di e vacuna, e ‘booster’ manera e ta wordo yama. Durante su entrevista na prensa, e mandatario a duna di conoce cu e ta sinti hopi bon y ta hopi satisfecho con e proceso a bay pa cu e vacunacion. Minister Maduro a splica cu e tabata un proceso liher caminda cu esnan trahando den e centro di vacunacion di DVG a sa di laga e proceso cana hopi liher y sigur. Durante su bishita tabata tin diferente hende cu tambe a bin vacuna mesun dia y esaki ta duna un sentimiento di trankilidad sabiendo cu mas hende a tuma e decision pa vacuna. Esaki kiermen cu poco poco nos ta bayendo den e bon direccion pa cu e recuperacion di nos pais.