POESIA DEN LOCKDOWN Djispi ta yuda tur ‘pensamentista’ ku skirbimentu di poesia GRÁTIS!

 

 

POESIA DEN LOCKDOWN

Djispi ta yuda tur ‘pensamentista’ ku skirbimentu di poesia GRÁTIS!

WILLEMSTAD – Den kuadro di nos di 10 aniversario di nos website Djis un Pensamentu (http://www.djisunpensamentu.com) ku tin komo lema: un E-magazine pa inspirá, eduká, konsientisá i entretené, Djispi, anfitrion di nos website, ta yuda tur poeta amatùr ku konseho i retroalimentashon di nan poesia gratuitamente. POESIA DEN LOCKDOWN. Ban kombertí negativismo den positivismo!

Komo ku Djispi ketubai ta di húbilo ku e tin 10 aña kaba online i mirando ku e LOCKDOWN akí tin nos tur ‘hestrès’, Djispi ta dispuesto di duna un man pa trata di yuda ku un krenchi den henter e situashon fèrfelu akí. Efektonan di Lockdown riba nos mente por ta funesto. No ta tur hende sa kon dil ku esaki. Un manera simpel pero ku alolargu tòg por tin benefisionan duradero ta di pone bo pensamentunan riba papel. Si akaso bo ta sinti bo rabiá, frustrá, impotente, bo no sa ki hasi … purba na pone bo sintimentu-, emoshon- i pensamentunan riba papel. Trata di hasi esaki poétikamente, ya mesora tambe esaki lo por kombertí den un hòbi ku kisas por trese asta benefisio i rekonosimentu pa bo den futuro. 

Bo por konsiderá e ‘kampaña’ akí komo un ‘1 on 1’. Kada pensamentista por manda un máksimo di dos poema. Bo por skirbi esaki na papiamentu, ingles, spañó òf hulandes. Djispi lo lesa bo dos poemanan, yuda bo ku struktura, uso di lenguahe, kontenido i presentashon di bo poema. Esaki lo sosodé via e-mail. Manda bo poema den formato Word, ya nos por komentá i komuniká ku bo di un manera mas kla i transparente. 

Bo poema lo no bini riba nos website, komo ku nos ta konsiderá esaki komo un yudansa personal. Henter e kampaña akí ta pa stimulá abo tambe ku kisas nunka a yega di skirbi poesia òf abo ku tin kustumber di skirbi poesia pero ku kisas tin mester di un empuhe òf un estímulo èkstra pa sigui skirbi. Pero Djispi ta hasi esaki prinsipalmente pa abo sinti bo kómodo i konfiá pa yega na publiká bo obranan poétiko. Kòrda ku, prinsipalmente den kaso di nos dushi idioma papiamentu, mas obra poétiko/literario nos isla tin, mihó esaki ta pa literarutura i kultura di nos pais. 

Pensamentistanan, bo ta liber di skohe e tema di bo poemanan. Tur edat ta bon biní. Manda bo poema òf 2 poemanan na nos adrès di e-mail: djispi@djisunpensamentu.com. Durashon di e kampaña akí ta pa e temporada di Lockdown aktual na Kòrsou. Ke men durante e temporada ku Gobièrnu di Kòrsou a deklará komo Lockdown. Si esaki terminá promé ku 30 di aprel 2021, nos sí ta sigui te e fecha akí. Dado kaso e Lockdown ta mas largu ku e fecha akí, e or’ei nos tambe lo ekstendé nos fecha límite te final di e Lockdown deklará pa gobièrnu.

Riba nos website tambe lo bo por lesa tur esaki atrobe den nos rúbrika Notisia Djispi, na e lenk akí: https://www.djisunpensamentu.com/notisia-djispi

Pa mas informashon por kontaktá Cathleen i Djispi tambe via nos formulario di kontakto di nos website na www.djisunpensamentu.com òf via nos number di telefòn 5999-668-8078. 😉

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: