Un kantidat grandi di votadó serio a aserká Partido Inovashon Nashonal (PIN) despues di elekshon ku e konvikshon firme, ku nan a vota riba un biyete di vota koló pretu ku blanku. Nan a informá nos ku e presidente di Konseho Elektoral (KE) a duna di konosé ku e votonan riba un biyete pretu ku blanku ta inválido i a pidi nos pa defendé nan derecho sagrado di voto. 

 

Willemstad, 31 di mart 2021

 

Un kantidat grandi di votadó serio a aserká Partido Inovashon Nashonal (PIN) despues di elekshon ku e konvikshon firme, ku nan a vota riba un biyete di vota koló pretu ku blanku. Nan a informá nos ku e presidente di Konseho Elektoral (KE) a duna di konosé ku e votonan riba un biyete pretu ku blanku ta inválido i a pidi nos pa defendé nan derecho sagrado di voto.  

 

Akshon 1: Email PIN di 21 di mart 2021 na KE

Komo promé akshon PIN a manda dia 21 di mart último un e-mail pa Konseho Elektoral den kua a menshoná un kantidat grandi di votadó na nòmber, ku indiskashon di e urna na kua según nan a relatá, nan a vota riba biyete pretu ku blanku i pa pidi KE pa atendé e issue aki.

 

Akshon 2: Partisipashon na e reunion di 24 di mart 2021 ku Konseho Elektoral

Komo di dos akshon pa haña informashon kiko por ta e kaso ku e asuntu di biyete pretu ku blanku, Partido PIN seguidamente a partisipá na e reunion ku KE dia 24 di mart, ku tabata intenshoná pa determiná e resultado di elekshon. 

 

Akshon 3: Email PIN di 24 di mart 2021

Na e reunión aki PIN a manda un di dos e-mail, ku e informashon risibí di votadónan awor den forma di un opheshon formal, ya ku kasi e presidente a sera e reunión di dia 24 di mart sin a trata e asuntu di vota riba biyete pretu ku blanku promé. Intenshon di KE tabata pa kontesta nos e-mail despues. 

 

Akshon 4: Observashon di habrimentu di saku di biyetenan di 6 urna komo resultado di e opheshon durante di e reunion di 24 di mart 2021 ku Konseho Elektoral

Komo nos di kuater akshon nos a opservá e habrimentu di e sakunan di e biyetenan riba kua a vota, esta bálido i inbálido, inusabel i no usá na e urnanan konserní. Esaki tabata e resultado di nos opheshon i un kontesta riba nos petishon na KE pa habri saku di biyete di vota pa nos por kontrolá. A kòntrola  6 urna. E eskoho di e urnanan tabata riba indikashon di esnan presente.  Ademas a disidí pa pone e prosesverbal di e reunion pa nos por lesa, i reuní 31 mart pa determiná e resultado di elekshon. 

 

Akshon 5: riba 30 di mart PIN a tuma nota di e relato den e prosesverbal di KE

Nos di sinku akshon tabata pa dia 30 di mart integrantenan di PIN bai WTC i tuma nota personalmente di e prosesverbal di KE kuta enserá nan akshonnan pa ku elekshon i e reunión di 24 di mart 2021. 

 

Mester remarká ku for di e prosesverbal por a konstatá ku KE a relatá, ku:

 

1. drùkmentu, transporte, wardamentu di stembiljet ta sosodé bou di vigilansha estríkto;
2. kada di 25 stembiljet a keda kontrolá i no a haña ni un biyete pretu ku blanku;  
3. den e prosesverbalnan di urna dia di elekshon di 19 di mart 2021, no tin menshon di biyetenan pretu ku blanku; 
4. no tin votadónan ku a pidi un anotashon ku nan a risibí un papel pretu ku blanku;
5. riba pregunta di KE na kada un di e 117 presidentenan di urna ku nan por a topa biyete pretu ku blanku, e kontesta tabata “no”;
6. urna 104 a mèldu ku dos votadó a trese dilanti -despues ku URNA a sera- ku nan a vota riba un biyete pretu ku blanku, pero ku for di kontròl dirigí spesífikamente riba e punto aki, no a sali ningún biyete pretu ku blanku;
7. e opservadónan di partidonan polítiko no a remarká ku nan a mira biyete pretu ku blanku;
8. durante di e reunion di 24 mart entre partidonan polítiko i votadónan ku KE, KE a habri sakunan di biyete di urnanan number 1, 35, 58, 67, 83 i 112, ku huntu ta bon pa 4471 voto bálido i 61 voto inbalido, entre kua tambe votonan blanku. No tabatin biyete pretu ku blanku.
9. for di momentu ku votashon a kaba, desenas di votadó a mèldu ku nan a vota riba un formulario pretu ku blanku.    Según KE hasta si sali for di e pensamentu ku a vota riba biyete pretu ku blanku, e no ta perhudiká e votadó, pasobra den e votonan invalido no tabatin niun riba un formulario pretu ku blanku.  
10. Mirando e kòntròl hibá pa KE pa ku e urnanan, e kombersahon ku e presidentenan di urna, e kòntròl na WTC riba saku ku votonan di 6 urna den presensia di partidonan polítiko, KE ta di opinión ku no ta probabel ku tabatin biyetenan pretu ku blanku. Pa e motibu aki KE no a yega na rekonteo i/o elekshon nobo.

 

Te asina leu e relato di KE.

Akshon 6: partisipashon na e reunion ku KE di 30 di mart 2021

E di seis akshon di PIN tabata pa partisipá na e reunion di 31 di mart. Durante e reunion aki KE a repasá e partidonan ku a keda elegí, esta ku a risibí asiento, e kandidatonan ku a haña asiento den parlamento i nan a firma e prosesverbal pa asina konkluí e parti aki di e proseso di elekshon. 

Akshon 7: Profundisá den e Kiesreglement i e prosesonan

Banda di e akshonnan ariba menshoná, PIN a tuma nota di e lei “Kiesreglement” i informá su mes di e proseso di atendementu ku e formularionan di voto, esta e drùkmentu, transporte, wardamentu di stembiljet ku ta sosodé bou di vigilansha, ets. PIN a profundisá den e proseso na urna ku no ta duna espasio pa kambia biyete di votashon ya ku ta direktamente i huntu ta habri i konta e votonan. 

Akshon 8: informashon serka opservadónan di PIN

Tambe PIN a check ku nos opservadónan na urna si nan a mira biyete pretu ku blanku. Nan a informá nos, ku nan no a nota na e urnanan ningun biyete pretu ku blanku. 

 

Akshon 9: opservahon di imagennan transmití

PIN a opservá ku imagennan transmití na televishon tampoko no a mustra ku tabatin biyete pretu ku blanku. 

Konsiderashonnan di PIN

Hopi hende serio representando diferente sektor di komunidat ta sinseramente konvensí ku nan a vota riba un biyete pretu ku blanku.

E prosesverbal di KE a spesifiká nan akshonnan ku a forma base pa nan konklushon ku no tabatin biyete pretu ku blanku. Nan a kontrolá kada di 25 biyete, ku for di +/- 125.000 biyete imprimi ta 5000 biyete den kua no a haña niun biyete pretu ku blanku.

KE ta konkluí ku si tabatin biyete pretu ku blanku mes, esaki no a perhudiká e votado paso den e votonan inbalido no tabatin biyete pretu ku blanku. 

E kòntròl di biyete di 6 urna den presensia di integrantenan di PIN i representantenan di otro partidonan ku ta representá un total di 4532 voto (balido i inbalido huntu) no a duna evidensia di eksistensia di biyete pretu ku blanku. 

E kòntròl via di ópservadónan di PIN na 16 diferente urna no a duna PIN evidensia di eksistensia di biyete pretu ku blanku. 

E revishon di imahennan grabá dor di media na urna no a duna PIN evidensia di eksistensia di biyete pretu ku blanku. 

Tin mas di 700 hende enbolví den e proseso elektoral na e 117 urnanan i ningun a trese dilanti ku nan a mira biyete pretu ku blanku.

Konklushon di PIN

Konklushon ta ku no opstante ku desenas di hende serio a raportá ku nan a vota riba biyete pretu ku blanku, PIN no a topa evidensia di esaki, esta ku tabatin biyete pretu ku blanku. Pa e motibu aki PIN ta konsiderá ku e no tin base pa mas akshon, no opstante e konvikshon di e kantidat grandi di hende ku a indiká ku nan a vota riba un biyete pretu ku  blanku i ku a meresé e esfuerso di PIN pa investigá si tin evidensia di nan ponensia. Pa PIN ta importante ku en todo kaso si tin voto pretu ku blanku mes, ku no a konta e votanan aki komo inbalido.

Rekomendashon pa futuro

PIN ta di opinión ku mester digitalisá e sistema di vota. Esaki mester sosodé ku e mashinnan ku ta duna oportunidat di un kòntròl via di un printout ku e votado mes por kontrolá mes ora i depositá den buzon di voto. Asina ta krea un kòntròl dòbel riba resultado di elekshon.