Voedselbank Kòrsou konmemorashon di nos trabounan di 1 aña largu pa motibu di Covid-19.

Kòrsou – 10 di aprel 2021 Fundashon Yudansa pa Kòrsou, mihó konosí komo Voedselbank, ta konmemorá ku eksaktamente 1 aña pasá Voedselbank a amplia su kapasidat di produkshon i distribushon di pakete di kuminda pa motibu di Covid-19. 

11 di aprel 2020 tabata e di dos djasabra di luna i manera kustumber ku e fondonan disponibel di e momentu ei, Voedselbank lo a traha alrededor di 100 pakete pa distribuí na su klientela. Pero 10 di aprel 2020, ku tabata por sierto Bièrnèsantu, Voedselbank a traha e promé 500 paketenan den un eskala mas grandi i siguiente dia a sigui ku 350 pakete di kuminda mas. Pues di 100 pakete, Voedselbank a bai na 850 pakete i e lunanan ku a sigui, solamente mas hopi so e kantidat di paketenan pa hendenan den nesesidat a bira. 

Na luna di mei Voedselbank a registrá e rèkòrt di luna kaminda, a yega 12.105 pakete i na luna di desèmber Voedselbank a yega e rèkòrt di traha 4500 pakete den un siman i repartí 5000 pakete di kuminda i 5000 pakete di Pasku riba un dia. 

 

Kiko esaki a nifiká pa Voedselbank? 

Entre 10 di aprel 2020 te ku 10 di aprel 2021, Voedselbank a eksperensiá hopi trabou, hopi responsabilidat, hopi tenshon i preokupashon. Kada fase a bin ku su retonan, sea ta di hendenan ku a pèrdè trabou na gran eskala, famianan ku no tin bùfer, no tin sèn di spar, kobradónan di ònderstant i penshonadonan ku no por sobrebibí ku nan entrada, hendenan ku no por skibi òf ta kambia number di telefòn pasobra no por paga debe, mamanan soltera ku no por proveé produktonan básiko pa nan beibi, hendenan ku no ta apresiá e kontenido di e pakete ku nan ta risibí, hendenan ku ta hasi bofon sin ku ta konsiente ta kuantu trabou ta ser hasí i di forma gratuito. 

Den e aña akí nos a eksperensiá tambe ku tin hende ku no ke traha, tin hende ku ta dispuesto na traha kua trabou ku ta, tin hende ku ta probechá di e situashon di haña un pakete di kuminda pòrnada, tin hende ku ta kere ku ta un obligashon Voedselbank tin pa duna nan i òf ta kere ku ta gobièrnu ta hasiendo e trabou akí, tin hende ku ta hasi mal uso di e yudansa sin komprondé ta kon a hasi yega na e yudansa, tin hende ku tin hopi nesesidat, tin hende ku ta apresiá asta e sakunan kibrá i tin hende honesto tambe ku ta bisa nan no mester mas. 

 

Kon Voedselbank por a logra esaki?

Ora ku wak bèk riba e 1 aña di Covid-19 ku Voedselbank ta konmemorá, pa un organisashon manera Voedselbank, Fundashon Yudansa pa Kòrsou/Stichting Hulp aan Curaçao, kua ta e nòmber ofisial ku ta eksistí for di 1977, Voedselbank por bisa ku tur loke ku a hasi, ta hasiendo i lo sigui hasi, ta solamente pa motibu di un otro hende, un organisashon, un kompania, un gobièrnu ku ta kere den e trabou ku Voedselbank i su hendenan ta ehersé. 

E infrastruktura, kompra, distribushon i produkshon di pakete di kuminda ta un spesialidat ku Voedselbank a atkerí trahando duru pa hopi aña sin e empeño i nesesidat pa “broadcast” e trabounan ku Voedselbank a hasi. 

Meskos ku Covid-19 a trese hopi kambio den nos bida, pa Voedselbank tambe, Covid-19 a kambia su destino. Si ántes Voedselbank por a traha bou di radar, aworaki pa motibu di Covid-19, henter komunidat sa di Voedselbank i ta pone un responsabilidat ageno enorme riba e organisashon pa yuda trese kuminda den kasnan di famia ku ta den nesesidat. 

 

Dikon Voedselbank a hasi esaki? 

Voedselbank ta un organisashon no-gubernamental ku tin komo meta pa yuda esnan di ménos rekurso den nos komunidat. Voedselbank no ta risibí supsidio i ta kontentu ku tur donashon i kontribushon ku ta risibí. Kada florin ku risibí ta bai bèk den e pakete di kuminda òf den e proyekto di stimulá kome fruta na muchanan ménos privilegiá di algun ‘na-schoolse opvang’. Durante e temporada di 10 di aprel 2020 te ku 10 di aprel 2021, Voedselbank a risibí hopi yudansa, tantu yudansa finansiero, di produktonan i di boluntarionan ku ta duna nan oranan di forma gratuito pa sea traha pakete, distribuí pakete, hasi kompra di produkto, buska fondo, hasi publisidat, registrashon di personanan den nesesidat i mas. Sin yudansa finansiero di kompanianan, personanan individual, organisashonnan, instansianan ku ta kere den e trabou ku Voedselbank ta ehersé, nos no por a hasi nada, pero sin e yudansa di e boluntarionan inkansabel ku algun di nan ta aktivo 52 siman konsekutivo hasiendo un trabou humanitario di e magnitut akí, nèt nèt nada nos no por a alkansá. 

Entre aprel 2020 te ku 10 di aprel 2021 komunidat di Kòrsou i Hulanda a aportá en grande i Voedselbank ta yama un i tur masha masha danki!

Voedselbank:

  • a risibí NAf. 4.7 mion florin di donashon riba su kuenta di banko.
  • a kumpra produkto na balor di NAf 3.9 mion riba merkado lokal.
  • a kumpra produkto entre yüni i medio òugùstùs na balor di NAf 1.6 mion florin via fondonan di Ministerio di Asuntunan Interior i Relashonnan di Reino (BZK) pa medio di Krus Korá.
  • tin un registro di 18.580 persona ku a hasi petishon pa yudansa di pakete di kuminda. 
  • a traha i distribuí alrededor di 85.000 pakete di kuminda.
  • a traha ku 90 organisashon ku ta tuma i distribuí pakete di kuminda.
  • a haña yudansa di mas ku 1000 boluntario.
  • a traha diariamente bou di sirkunstansianan ekstraordinario dor di Covid-19 pa keda yuda nos komunidat.

 

Kon Voedselbank ta bai sigui?

No opstante ku Voedselbank ta konsentrá riba yudansa ku un pakete di kuminda te kaminda ku fondonan ta pèrmití, Voedselbank por a mira durante e aña ku ta tras di lomba, ku pobresa den nos komunidat ta amplio i di hopi faseta. I lo ta bon si kada siudadano di nos komunidat por aportá di un òf otro forma na yudansa den esaki. 

Ku yudansa di un i tur, Voedselbank ta sigui ku su trabounan den e próksimo fase di Covid-19 i den futuro. Den e futuro aki, Voedselbank ta spera di por duna mas aporte, guia i konosementu na esnan ku ta den nesesidat. Ni maske ku fondonan a baha pa motibu di diferente inisiativa gubernamental ku ta ekstendé yudansa na esnan den nesesidat, aktualmente ainda Voedselbank ta yudando alrededor di 7000 famia ku un pakete di kuminda basá riba fondonan partikular. Tur dia Voedselbank ta risibí petishon pa registrashon nobo di kua na e momentunan akí Voedselbank mester ninga. 

Yudansa boluntario tin sufisiente, pero yudansa i aporte finansiero ta keda importante pa Voedselbank por sigui yuda esnan den nesesidat ku un pakete di kuminda i mas. E trabou ku Voedselbank ta hasiendo, ta enrikesé tur su boluntarionan i p’esei e ánimo t’ei ainda pa sigui despues di 1 aña di trabou intensivo. Si solamente nos tur komo komunidat komprondé ku un otro hende ta priva su mes, p’e yuda su próhimo ku e no konosé, mester bira sufisiente pa nos sea agradesido i apresiá ku nos komunidat ta kapas di yuda otro. Realisá ku un otro hende a laga su trabou, su soño, su otro tareanan, su sèn, su tempu, su salú, su konfortabilidat p’e traha tur dia den un ‘loods’ kalor manteniendo medidanan ekstrikto di Covid-19, pa yuda esun ku ta den nesesidat. I ora ku na final di dia, bo mira e kantidat di tasnan yená pa bai nan destinashon, un sensashon di kombibensia i gratitut, e impreshon magnífiko ei, ta pone bo kurason bira chikí pasobra nos ta realisá ku un otro ta Yuda nos Yuda!

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: