AUALECTRA TA STRECH SU ORANAN PA SIRBI MAS KLIENTE NA E MOMENTU KU MAS TA KUMBINI NAN

 

KOMUNIKADO DI PRENSA
AUALECTRA TA STRECH SU ORANAN PA SIRBI MAS KLIENTE NA E MOMENTU KU MAS TA KUMBINI NAN
————————————
Willemstad – 11 di Aprel 2021 – Aqualectra ta traha duru i no ta spar ningun esfuerso pa mehorá su servisio na kliente. Aqualectra su Sentro di Servisio, aksesibel via 0800 0135 ta instrumental den Aqualectra su servisio na su klientenan. E ta e punto prinsipal pa Aqualectra atendé petishonnan pa servisio di kliente i tambe traha sita. Pa e motibu aki a amplia e ora ku Aqualectra su empleadonan den e Sentro di Servisio tei kla pa sirbi nos klientenan. Awor por yama Aqualectra su Sentro di Servisio na 0800 0135 di djaluna pa djabièrnè di 7or di mainta pa 7or di anochi pa tur petishon di servisio na Aqualectra. Por sigui yama 0800 0135 alkansabel 24/7 i grátis pa kualke ‘storing’ òf informashon ku ta deseá.
Ademas di e ampliashon di orario di servisio na telefon, bo por traha un sita ku Aqualectra awor tambe riba djasabra. Si bo ta deseá bo por bai aqualectra.com pa traha un sita fásil. Aki bo por hasta manda dokumentunan nesesario pa asina Aqualectra por sirbi bo mas rápido ora di bo sita. Di e forma aki Aqualectra ta sigui hasi esfuerso pa bo por regla bo asuntunan trankil den tur komodidat, i na e momentu ku mas ta kumbiní bo, asina sobra tempu pa bo mes i e kosnan ku mas bo gusta hasi den bida.
Aqualectra su Sentro di Servisio na telefòn awor di djaluna pa djabièrnè di 7 pa 7
Aqualectra, ku kambio den demanda di klientenan, tambe ta kambia su forma di sirbi klientenan pa esaki pas mas ku e kliente su patronchi di bida. Regla bo asuntunan na e ora ku mas ta kumbiní bo den e forma mas kómodo ta e norma. E pandemia a obligá nos tur kambia pa atendé ku otro den un ambiente mas seif. Klientenan di Aqualectra ya a kustumbrá ku ta yama 0800 0135 pa tur petishon pa servisio di Aqualectra òf pa traha un sita pa regla algu na Aqualectra. P’esei Aqualectra ta amplia e ora ku klientenan por alkansá su Sentro di Servisio na telefòn. Awor por yama for di 7 or di mainta, pero tambe fin dia promé ku 7 or di anochi. Anto si bo ke bishitá nos Sentro di Kliente na Otrabanda, i den siman bo no logra, awor bo por traha un sita pa bai na Aqualectra su Sentro di Kliente riba djasabra tambe.
Aqualectra.com i Mikuenta
Banda di e Sentro di Servisio, awor mas disponibel pa klientenan di Aqualectra, semper ta keda opshon pa hasi uso di posibilidatnan ofresé riba aqualectra.com. Aki bo mes por skohe fecha i ora pa bo traha bo sita ku Aqualectra. Riba e wepsait mes bo por entregá na mes momentu e dokumentunan nesesario pa asina fasilitá bo sita. For di aqualectra.com mes bo por subi MiKuenta pa tur informashon tokante di bo resibu i uso di koriente i awa. Suskribí na MiKuenta i risibí bo resibunan den bo e-mail tur luna mientras bo por disponé di komparashonnan interesante pa yuda bo manehá bo uso di awa i koriente.
Kompensashon “Danki na Bo”
Klientenan ku ainda no a apliká pa nan kompensashon “Danki na Bo” por bai ainda riba aqualectra.com i apliká. Por yama tambe 0800 0135 i apliká pa bo kompensashon. Klientenan ku tin Pagatinu so mester keda pendiente pa momentu ku nos Sentronan Temporal habri bèk, ya asina nan tambe por apliká pa nan kompensashon.
Den e próksimo tempu por spera Aqualectra introdusí mas medio pa fasilitá e servisio na kliente. Di e forma aki Aqualectra banda di garantisá awa di kalidat i koriente na un forma duradero ta adaptá su servisio tambe pa sirbi e nesesidat di e kliente.
-FIN-

This site uses Akismet to reduce spam. Learn how your comment data is processed.

error: Content is protected !!
%d bloggers like this: