Kandela di mondi na Ser’i Kandela, Kaya Sucre ta kousa hopi molester di huma.

Willemstad – Un kandela grandi di mondi na Ser’i Kandela, Kaya Sucre ta kousando hopi

molèster di huma pa e área di Ser’i Kandela i besindario. Brantwer Kòrsou a risibí notifikashon ayera 19 di aprel 2021 alrededor di 10:48 mainta ku mester tin un kandela di mondi basta grandi na Ser’i Kandela.

Brantwer Kòrsou a dirigí vários unidat na e sitio di e kandela pa kuminsá kombatí e kandela di mondi. Na e sitio Brantwer Kòrsou a konstatá ku ta trata di kandela grandi

di mondi i mirando e embergadura di e kandela mester a hasi uso di tres “loader” tambe pa kombatí e kandela. A limpia riba e tereno parti nort di e kandela kaminda tin mondi pa evitá ku e kandela ta sigui ekspandé.

Na e momentunan aki Brantwer Kòrsou ta hasiendo su maksimo esfuerso pa kaba kombatí e kandela mirando ku ainda e ta un “kandela di fòrnu”.

Un apelashon ta bai na habitantenan i negoshinan den e área di Ser’i Kandela, Souax, Gato, Papaya i besindario pa tene bentana i porta di kas i/òf edifisionan sera. Personanan ku ta eksperenshá molèster i/òf personanan ku ta sufri di un malesa respiratorio ta ser konsehá pa bandoná e área i keda na un otro sitio. Habitantenan di barionan den serkania mester tene kuenta ku molèster di holó di huma por permanesé algun dia.