Seremonia Dia di Sakrifisio Patrimonial tabata simpel i solem

Seremonia Dia di Sakrifisio Patrimonial tabata simpel i solem

Geplaatst op 04 May 2021 dor di Ministerio Asuntunan General i Promé Minister

WILLEMSTAD –  “Libertat ta un derechi, pero nunka malusá bo libertat pa satisfasé interes propio”, tabata palabranan ku Dominee Ray Schalkwijk a ekspresá den su disertashon awe mainta durante e seremonia riba Dia di Sakrifisio Patrimonial. Tabata un seremonia simpel i adaptá na medidanan relashoná ku e pandemia di Covid-19.

Den henter Reino ta para ketu awe na tur esnan ku a pèrdè nan bida, sea den un parti di Reino Hulandes òf na kualkier parti di mundu. Awe dia 4 di mei Gobièrnu di Kòrsou, Marina Real i VKC no solamente a konmemorá esnan ku a bringa den di Dos Guera Mundial, pero tambe esnan ku a muri den otro guera òf atakenan terorista.

E aspekto di libertat a bin mas tantu dilanti e aña akí. Nos por kompará e tempu di pasado durante kua nos hendenan mester a lucha i sakrifiká nan libertat ku e tempu aktual kaminda nos libertat ta limitá pa motibu di e pandemia di Covid-19. “Si nos respetá otro su libertat nunka mas lo mester lucha pa esaki”, sr. Schalkwijk a kulminá su disertashon.

E seremonia a kuminsá 9’or di mainta na e ‘Monumento di Víktimanan di Guera’ na Waaigat. Despues a sigui pa Santana Militar na Roodeweg kaminda a tene un seremonia simpel pa kulminá e okashon.