Eugene Rhuggenaath lo no huramentá pa drenta parlamento dia 11 di mei próksimo.

REDAKSHON May 11, 2021 0 Comments

Eugene Rhuggenaath: mi ta para pa e proseso di transformá i hubenese partido PAR

Ku regreso di señor Eugene Rhuggenaath den partido PAR, kual señor Eugene Rhuggenaath a liderá pa ku elekshon den 2017, ganando e elekshon, un di señor Eugene Rhuggenaath su punto di lansa tabata pa trese hóben i hóben profeshonal partido PAR ken por a rekonosé nan mes den e ideologia di partido PAR.
Proseso ku señor Eugene Rhuggenaath a kuminsá huntu ku su direktiva kual tabata bisto ku e lista, ku hopi kara nobo ku partido PAR a entrega na Konseho Supremo Elektoral pa bai elekshon di 19 di mart último.
Señor Eugene Rhuggenaath a splika ku énfasis i detayadamente ku presentashon di e lista di kandidatonan pa elekshon, ku direktiva tin ku sigui ku e proseso di transformashon i hubenese partido PAR, formando lidernan pa futuro i pa e próksimo elekshon, ku lo ta na aña 2025.
Basá riba resultado di elekshon último i un presentashon preliminario di un komishon instituí dor di direktiva pa evaluá partido i e resultado optené, lider polítiko señor Eugene Rhuggenaath a i ta sinti su mes yamá pa ta esun responsabel, pa dediká su mes na e proseso entamá pa reformá i restrukturá partido PAR preparando pa e siguiente elekshon.
Lider polítiko señor Eugene Rhuggenaath lo inkluí tambe su guia i sosten na frakshon di PAR den parlamento unda PAR lo hiba un oposishon konstruktivo i krítiko pa un mihó Kòrsou den e momento difísil ku nos dushi pais ta pasando aden.
Basá riba e punto nan ariba menshoná señor Eugene Rhuggenaath a disidí pa tuma e proseso di transformashon, reformashon i restrukturashon den su kalidat di lider polítiko pa hasi PAR e alternativa real pa e próksimo elekshon.
Motibu pa kual señor Eugene Rhuggenaath kargando su responsabilidat di un lider, manera señor Eugene Rhuggenaath den su kalidat di Minister Presidente a karga Gobièrnu di Pais, señor Eugene Rhuggenaath lo no huramentá pa drenta parlamento dia 11 di mei próksimo.
Ora ke papia di lider i liderazgo, ata e prueba di un berdadero lider, señor Eugene Rhuggenaath.
Señor Eugene Rhuggenaath ke hasi uso di oportunidat aki pa yama danki pa e konfiansa duná pa por a sirbi nos dushi Kòrsou komo Promé Minister for 2017.
Direktiva huntu ku señor Eugene Rhuggenaath ta yama tur PARistanan, Votadónan i Simpatisadónan masha danki pa e konfiansa.

SIGI KANA KU PAR!